Sama sa uban nagdamgo usab ako nga natuman na ang tanang proyekto nga gilaraw sa atong mga political leaders. Akong nakita nga daghan na kaayong mga sakyanan nga nagbiyahean sa trans-axial highway ni anhing Bise Gobernador Gregorio G. Sanchez. Nakita ko usab ang Light Railway Transit nga nagsugwak sa mga pasahero gikan sa lungsod sa Argao padulong sa dakbayan sa Danao.
Si Rep. Eduardo R. Gullas sa unang distrito sa lalawigan sa Sugbo mao ang nangusog nga ang LRT mabutang aron moserbisyo sa mga pasahero sa amihanang Danao City ug habagatan nga lungsod sa Argao. Nagsugwak sab ang Bus Rapid Transit ni Rep. Tomas R. Osmeña. Nagdasok na ang South Bus Terminal sa mga bus kay ang mga trak de pasaheroan gikan sa Bohol ug Negros anha naman mogarahi. Ang Sugbo wala nay suliran sa panubig kay gitubag na man kini sa Inabanga, Bohol pinaagi sa hangyo ni kanhi Cebu Governor Lito R. Osmeña. Ang Sugbo giila nga usa ka malamboon nga dapit tungod sa iyang kusog nga paglambo.
Gani nakadawat man kini og pasidungog nga usa sa napulo ka mga siyudad nga mga maayong puy-an. Nagdamgo sab ako nga ang dakbayan sa Sugbo mao gihapon ang numero uno nga tinubdan sa labing tam-is nga mangga sa nasud. Apil sa akong damgo mao nga ang dakbayan ug lalawigan sa Sugbo mao ang nakahatag og labing dakong garbo sa nasud. Tungod kay ang Sugbo naka-anak man og usa ka presidente, duha ka supreme court justices, duha ka pangulo sa senado, mga artista sa puting tabil, basketball players ug major tourist destination sa nasud.