Katigayonang dili mapasabot

Nakita sa buhatan sa Visayas Ombudsman nga sad-an sa kasong administratiba (serious dishonesty ug grave misconduct) si kanhi Marina director Glen Cabanez. Kini human wala makapasabot sa iyang mga katigayonan nga gipanag-iya. Nasuta sa Ombudsman nga wala motakdo ang kantidad sa katigayonan sa kanhi direktor sa iyang kinatibuk-ang suholan nga nadawat. Ang Ombudsman wala motoo sa mga pagpasabot ni Cabanez.

Tungod niini girekomendar sa Ombudsman ngadto kang DOTC Secretary Mar Roxas III ang pagtangtang ni Cabanez sa serbisyo dihadiha dayon. Gawas niini, gipakanselar usab ang eligibility sa kanhi direktor, gipawagtang ang iyang mga benepisyo ug gidid-an nang makahupot og katungdanan sa gobyerno hangtod sa hangtod.

Aron sa pagseguro nga mapatuman gayod ni kalihim Roxas ang ilang kamandoan sa pagtangtang ni Cabanez, gihatagan siya og pila ka adlaw sa pagsumiter sa iyang taho ngadto sa buhatan sa Ombudsman.

Bisan tuod og dihadiha ang pagpatangtang ni Cabanez sa katungdanan, dili gihapon ni siya matangtang tungod kay hutdon pa ni Cabanez ang iyang mga natigom nga katigayonan panahon sa iyang pagpangatungdanan aron panalipdan ang iyang pangalan. Busa sa nagreklamo kaniya dili pa hingpit ang imong kadaugan.

Ang Ombudsman mao ang tigpanalipod sa interest sa katawhan, sila ang kanunay nga mag imbestigar sa mga kahiwian nga nahimo sa ilang mga kauban nga nanerbisyo sa gobiyerno. Sila ang mag-usisa sa ilang mga kauban sa gobiyerno nga gipasanginlang nanapi, pero kinsa man ang moimbestigar nila kun sila ang manapi. Kinsa man ang moimbestigar sa ilang kauban nga aduna usay dili mapasabot nga katigayonan, pananglitan lang?