Nagpatuyang sa gibati

Nalipay ko kay giaksyonan diay sa Squatters Prevention Encroachment Elimination Division (SPEED) ang reklamo kabahin sa mga tindahan nga gitukod sa aseras didto sa Salvador Street, Labangon.

Gituyo man gud nga gipadaku ang Salvador Street aron paspas ang dagan sa mga sakyanan, apan peligro kaayo kay ang mga tawo nga maglakaw dili na man makaagi sa aseras.

Samtang nalipay ko apan makaingon kita nga angay pa ba g’yud diay nga dunay moreklamo usa aksyonan sa SPEED ang maong mga illegal structures nga anaa gitukod sa agianan sa tawo?

Aw, sagdi na lang kun ingon niana ang batasan sa mga sakop sa SPEED basta moaksyon lang usab dayon sila kun makadawat og report. May lain ko nga gipadangat nga reklamo ug kini mao ang pagamit sa aseras diha sa eskena Bonifacio ug Sikatuna kay gihimong baligyaanan sa mga makaon. Anaa g’yud kini mahimutang sa eskena og ang mga tawo anha na moagi sa karsada.

Maayo ba gud ni SPEED chief Noel Artes?

* * *

Hilabihan ka dugay mahuman sa sesyon sa konseho sa dakbayan nga nagdiskutir kabahin sa giproponer ni Mayor Michael Rama nga P11.8 bilyones nga budget para sunod tuig.

Ang nakapalangan niini kay dunay pipila ka konsehal nga wala mosubay sa lagda kun unsay mga ipangutana sa department heads nga ilang gipatawag. Sa unang semana ang gituki sa mga konsehal basi sa lagda nga gihimo sa Committee on Budget and Finance mao nga ang hisgutan mao ang “sources of funds” kon asa og kwarta ang dakbayan nga ikapundo sa budget nga P11 bilyones.

Gikan niadtong miaging Lunes, ang gituki mao na usab ang “proposed expenses” kon unsa nga mga proyekto nga gastohan sa maong salapi. Inay Huwebes ra unta kutob, milapas og giapil ang Biyernes.

Apan nakabantay si Konsehal Margot Osmeña nga kuwang gihapon ang oras mao nga iyang nahukman nga ang hepe sa Department of Engineering and Public Works (DEPW) ugma nang adlawa sukit-sukiton. Bisan si Konsehal Osmeña miangkon nga dunay mga konsehal nga nagpatuyang na lang sa ilang gibati. Inay sukit-sukiton kun unsa kamahinungdanon ang gisugyot nga proyekto, mihimo na man hinoon og sugyot ngadto sa mga department head kun unsaon pagpalambo sa ilang gidumala nga opisina.

Nindot kaayo nga sila motabang paghuna-huna og maayong paagi apan himoa kini sa laing higayon, ayaw sa budget conference. Ang maong mga pangutana kun natumong pa nga si Konsehal Joy Pesquera aktibo pa sa konseho, gibaraw na mo.

Maayo unta og ang mga konsehal magmatngon nga ang ilang mga pangutana masubay sa isyu nga gituki. Matud pa sa usa ka department head, “out of tune” kuno.

Salamat ni Konsehal Osmeña nga iyang gibaraw ang daghang mga “out of tune” nga pangutana kay wala na siya kaagwanta.

* * *

Karong buntaga, mo-travel mi paingon sa habagatang kalungsoran sa Sugbo nga magsakay lang og motorsiklo.

Unang higayon pa kini nako nga makasuroy sa maong mga lungsod nga magmotor uban sa mga barangay kapitan, ingon man sa akong higala nga si Konsehal Ritchie Osmeña.

Ambot modayon ba kaha og uban sa among biyahe ang duha ko ka kaubang reporters nga sila si Edison delos Angeles sa DYAB ug si Philipp Cerojano sa Superbalita. Anha g’yud maila kun tinuod ba sila nga mga lalaki, kun dili ba bayot nga ikasabot.