PIO seminar milampos

Nagmalamposon ang duha ka adlaw nga public information skills development seminar nga gipahigayon niadtong Nobiyembre 24-25 sa Alta Cebu Village Garden Resort sa Cordova, Cebu.

Ang maong duha ka adlaw nga seminar gisalmotan sa tanang mga public information officer sa matag fire station lukop rehiyon 7. Dikalibre ang mga resource speakers sa maong seminar.

Si Ms. Jaybee Binghay ang public information officer (PIO) sa Department of Social Welfare and Development 7 (DSWD) nga mipaambit sa iyang kahanas sa natad sa public speaking ug sa kun unsa ang sakto nga pag-handle sa mga media interviews.

Gihatagan og emphasis ni Binghay ang kamahinungdanon sa maayong relasyon ang media ug sa tanang mga ahensiya sa gobyerno. Napuno gyud sa mga nindot ug mahinungdanon nga inpormasyon ang nakuha sa mga information officers diin dako kaayo kini og bintaha hilabi na sa paghatud sa publiko sa mga tukma ug tinud-anay nga impormasyon kabahin sa Bureau of Fire Protection Region 7.

Sa ikaduhang adlaw wala usab magpaulahi si Mr. Tonee Despojo ang photo editor sa Cebu Daily News sa iyang pagpaambit sa labing sayon nga paagi ang basic photography ug photojournalism.

Sa tanan nga mitambong sa maong seminar hinaut nga madala kini nila sa ilang tagsatagsa ka fire station ug mapalambo pa unta ang paghatag sa publiko sa saktong mga inpormasyon sa ilang lugar.

Sa pikas bahin, dili na gyud mapugngan ang atong labing grandyoso nga kasaulogan sa tibuok tuig nga mao ang Pasko sa pagkataw sa atong manunubos.

Gani karon ang kataposang Sabado sa Nobiyembre 2011 ug sa sunod semana motungtong na kita sa bulan sa Disyembre. Daghan na gyud kanato ang nagkarakara sa pagpangandam sa maong kasaulogan.

Ang mga ahensiya sa gobyerno nga maoy gitahasan sa pagsiguro nga luwas ang atong pagsaulog sa Pasko hagbay ra nga nangandam. Ang Department of Trade and Industry (DTI) ug ang Bureau of Fire Protection (BFP) nga subsob na ang kampanya sa pagsiguro nga hingpit kitang luwas sa sunog ug uban pa nga kalamidad nga posible unyang motumaw.

Sa kataposan. Ugma na ang kataposang adlaw sa upat ka Domingo nga bar exams nga gipahigayon didto sa University of Sto. Tomas (UST) diin daghan kita og mga higala nga mikuha sa maong pasulit. Sa tanan nakong mga bro’s and sis’s sa Societas Reus Legis nga mikuha sa 2011 bar exams, goodluck and God bless ninyong tanan.