Una niini, gibutang si kanhi presidente nga karon kongresista Gloria Macapagal Arroyo ug pipila ka mga tawo sa watch list order sa Department of Justice (DOJ).
Sa dihang gikwestiyon kini sa kampo ni Arroyo ang Korte Suprema nihukom sa paglibkas sa maong orden sa DOJ pinaagi sa pagpakanaug og Temporary Restraining Order (TRO). Nireklamo ang mga anti-Arroyo sa hukom sa labaw'ng hukmanan kay sumala pa nila ang hurado nga tinudlo ni Arroyo mipabor kaniya gawas kang Associate Justice Carpio.
Apan wa pa gani mapatuman ang TRO nakahukom si Pasay City RTC Judge Jesus Mupas nga adunay probable cause ang kasong election sabotage nga gipasaka sa Comelec sa iyang sala. Tungod niini niisyu siya og warrant of arrest aron pagdakop kang Arroyo ug uban pa.
Nikisikisi ang mga abogado ni Arroyo kay sumala pa nila gidalidali lamang sa maghuhukom ang pagpadakop sa kanhi presidente.
Ilang gikwestiyon ang nag-imbistigar sa maong kaso ug uban pang mga punto legal ngadto sa Korte Suprema.
Ang atong makita dinhi nga bisan ang mga sakop sa labaw'ng hukmanan ug ang mga huwes mga tawo usab nga mobawos og utang kabubut-on ug ang uban madala gani sa tinagingting sa salapi. This is not a perfect world.
* * *
Stressful kaayo nako karong semanaha. Pagka-ugma human ako operahi sa cataract ni Dr. Potenciano Larrazabal lII, niadtong Lunes- ni-preside ako sa special meeting sa Regional Development Council (RDC7) - Infrastructure Development Committee (IDC),
Ang bugtong agenda sa maong meeting mao kun iduso ba ngadto sa RDC Full Council ang findings and recommendations sa Technical Working Group (TWG) nga na-oktaba niadtong nilabay'ng regular meeting sa IDC.
Gawas sa mga sakop sa IDC nitambong usab si kanhi kongresista Raul del Mar, nga maoy nagrepresentar sa iyang anak Kong. Cutie del Mar nga maoy nagpasiugda sa duha ka mga kontrobersiyal nga flyover projects sa Cebu City.
Nagamit gayud nako ang akong nakamauhan nga Robert's rules ug ang Manual of Operations sa RDC mao nga wa magkayagaw ang diskusyon sa maong panaghugpong.
Sa dihang gihimo ang botasyon, sa 23 ka mga kalipikadong botante, unom ang mipabor ug 15 ang supak nga iduso ang maong report ngadto sa RDC. Bisan pa niini, si Mayor Mike Rama nga mao usab ang RDC chairman nipahibawo nga iyang ipahibawo sa mga sakop sa RDC full council karong Lunes ang maong report isip for information sa mga sakop. Abangan ang susunod na kabanata.
* * *
Sa dugay nang higayon wala ako makatambong sa RDC Full Council meeting tungod kay ma-atul kini sa akong pag-anchor sa balita sa Cebu Catholic Telvision Network (CCTN) TV47.
Karong Lunes (dili Nov. 18 sigun sa akong gihisgutan dinhi niadtong niaging isyu) motambong ako aron moapil sa diskusyon sa mga butang nga makahatag og kaugmaran sa rehiyon ug mahimamat ang akong mga suod nga higala nga dugay na nako nga wala makita sama kanila ni Tagbilaran City Mayor Dan Lim, Bohol Gov. Edgar Chatto, RDC Co-chairman Argeo Milisimo ug uban pa.
* * *
Duna koy unsolicited advice ngadto sa mga doktor. Kinahanglang customer-friendly ang inyong mga clinic. Ang inyong pasyente dili na unta maglabanglabang gikan sa usa ka building ngadto sa lain. Sama sa nahitabo kanako.
Nibalhin ako ngadto kang Dr. Potenciano Larrazabal III sa Cebu Doctors Hospital bisan kun dako na ako og nagasto sa usa ka ospital kay hasol ug kapoy kaayo'ng maglabanglabang ug lisud pa gayud ang parking.
Ang Cebu Doctors Hospital mao ang matawag og one-stop hospital. Gawas nga moderno og kahimanan, labi na ang ilang Larrazabal Eye Centre, mas dali nga matagad ang daghan kaayong mga pasyente tungod sa daghan nilang mga doctors ug aides.
* * *
Email: mannyrabacal@yahoo.com