EDITORYAL - Ang bunos ug ang buhis niini

Ang Disyembre, maoy nabantog nga buwan nga tinghatag sa bunos.

Way tawong di malipay kun makadawat og bunos, magamay man o madako basta bunos, kuwarta nga hinatag ug di utang nga pabayran pa sa imong amo   kanimo.

Sa mga pribadong amo sa mga trabahoang pribado, kun kini mohatag og bunos sa iyang mga kawani, bunos nga limpyo nga wa ka nay hunahunaon pang bayronong buhis.

Lahi sa gobyerno nga kun mohatag og insentiba sa iyang mga kawani, tibhangan daan sa kantidad nga angay kuhaon niini subay sa gitakdang panukdanan nga gisita sa balaod sa pamuhis.

O kaha adto na tibhang sa imong kobrahunong suweldo matag buwan.

Ang uban malipay, apan ang uban usab masubo, tungod kay   human madawat ang gituohang bunos, inigliwas sa Disyembre paninglon na ang imong buhis gikan sa bunos nga imong gidawat.

Usahay di lang pahibaw-on ang usa ka kawani, apan kun moreklamo ka nganong gamay ra ang imong nakobra nga suweldo, anha pa nimo hisayri nga gihinay-hinayan diay og tibhang ang imong binuwang   suhol sa buhis sa bunos nga imong nadawat.

Tungod kay pareho ang dawatonong bunos sa tanang kawani, managsama usab ang bayronong buhis niini.

Apan sa dagko og suweldo, sakit man apan gaan-gaan ra sa bulsa niini ang bayronon niyang buhis, lahi sa gagmay og suhol nga mabug-atan ilabi na kun ang suhol niyang dawatonon sa matag tingsuweldo, igo o kuwang pa ba sa gastoanan niya sa iyang pamilya.

Hinuon sa laing bahin, di mabasol ang gobiyerno tungod kay ang pagpangobra niini og buhis, gitumong man aron maoy ipadagan sa tanang kalihokan sa kagamhanan.

Ang buhis maoy dugokan sa nasud, diin sa higayong di kini tumanong tinarong sa magbubuhis, adunay gaba nga moabot sa iyang kinabuhi ug panginabuhi. Kay ang di pagbayad sa hustong buhis, sama ra kakunsabo ka sa kawatan sa buhis, o mga tawong mibulsa sa buhis. Di ba?