Ang pagpanaygon sa mga PUJ

Gitinguha karon sa mga opisyal sa kagamhanan sa dakbayan sa Sugbo ang pagpalabang og ordinansa nga higpit nga magdili sa pagpanaygon sa sulod sa mga PUJ.

Kining maong tinguha angay pagakpakan sa pagsuporta sanglit dugay na kining gireklamo sa mga sumasakay apan wala gayod kahatagi og pagtagad sa atong kagamhanan.

Gikinahanglan na kaayo ang maong lakang sa kagamhanan sanglit nakahatag man kini og kahasol sa mga pasahero sa matag higayon nga ang PUJ nga ilang giluwanan kalit lang sakyan og grupo sa mga minor de edad nga mangayoay og kuwarta.

Gipaabot usab nga mohimo og susamang lakang ang mga opisyal sa kagamhanan sa Mandaue sanglit gihimo man usab kini sa maong grupo sa mga PUJ nga nagdagan sa kadalanan sa dakbayan sa Mandaue.

Ang tinuod hagbay na nga nagpaabot ang mga sumasakay sa PUJ nga hatagan na kini og pagtagad sa mga opisyal sa kagamhanan tungod kay dili lang makasamok sa mga pasahero ug daw makahatag usab kini og kahadlok nga maoy hinungdan nga mapugos na lang sa paghatag og kuwarta.

Sa dili pa mokanta ang maong grupo sa ilang pagsakay maoy ilang himoon ang pagpahibalo ngadto sa mga pasahero nga dili sila kawatan, dili sila snatcher, dili sila mangunguot, dili tulisan kun dili mangayo lamang sila og kuwarta.

Nunot sa ilang pagpahibalo daw bation gayod og kahadlok ang mga pasahero kay ang ilang mga hitsura ug pamayhon daw kadudahan nga mga adik-adik.

Unya, human sa ilang pagkanta maoy ilang himoon ang pagpangablit sa mga pasahero ug mamugos sa pagpangayog kuwarta ug pagkahuman manaug nga dili gani motunol og plite ngadto sa drayber nga giluwanan niini.

Ang grupo sa mga batan-on nga sagad kanila gidudahan nga nalambigit sa paggamit sa ginadiling drugas dugay na kaayo nga naghimo sa mao nilang kalihokan sa dakbayan sa Sugbo ug dakbayan sa Mandaue.

Sa dakbayan sa Mandaue sagad kalit lang mosakay sa PUJ ang maong grupo sa mga minor de edad; anha sa dalan M.C. Briones sa Subangdaku, Tipolo ug barangay Guizo, samtang sa up town ug downtown area usab sa dakbayan sa Sugbo. (Romeo T. Limpangog)