Himaya...kasakit...

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang pagpakabuhi niining kalibutana lisod labi na ang anaa sa ubos nga kahimtang, sama sa manok “isang kahig isang tuka.

“Mapalad kadtong mga igsoon nato nga gidebuenas nga gikan sa kalisod nahaw-as, kalit lang nausab ang ilang kinabuhi sama pananglit sa atong pambansang kamao nga si Manny Pacquiao usa lang siya sa mga nilalang nga dugay’ng gaantos sa kalisod gumikan sa iyang dedikasyon sa pagpamoksing karon usa na sa mga ilado sa tibuok kalibutan.

Kay sikat na lagi, nausab ang set-up sa iyang kinabuhi sa pagkaon, sa mga butang iya nang maangkon kun unsay iyang gusto, kun imo siyang itandi sa mga artista labaw pa si Manny.

Sa iyang naangkon nga himaya o kausaban sa iyang kinabuhi makaingon siguro kita nga sa adlaw nga tanan puro kalipay na ang iyang kinabuhi, mao ni kasagaran ang mosantop sa hunahuna kay nagtuo sila nga kun abunda ka sa tanan wala nay kasakit. Tinuod kana kun ang atong kinabuhi o lawas ang gipangita puro kalibutanon, apan ang atong espiritu nanginahanglan pud og Ginoo nga himuon sa tawo ang kinasingkasing nga pagpakabana sa iyang isigkatawo ug dili pagpakabana atubangan sa camera nga makita sa telebisyon o mantalaan.

Gusto niya panggaon nato ang atong isigkatawo sama sa pagpangga nato sa atong kaugalingon ug kana maoy lisod himuon sa mga tawo nga busy na kaayo sa ilang mga nakab-ot nga himaya.

Maong adunay verse ang Ginoo didto sa Balaang Kasulatan nga nagaingon “Ang mga dao maglisod pag-adto sa langit kay ang ilang agianan sama sa bangag sa dagum” ang maong panultihon nagpahinumdom nato nga dili ta angayang magtapok ug mga kalibutanong butang kay kita lumalabay ra ug dili nato madala sa atong pagbiya. Kinahanglan natong itipig ang mga langitnong binuhatan nga maoy atong madala ig-atubang nato sa Diyos nga maoy tinubdan sa tanan.

Ang kasakit tipik sa atong pagpakabuhi ning kalibutan isip mga Kristohanon kay ang himaya nga atong gipangandoy iya rang ihatag ug ibalos ig-atubang nato Kaniya.

Ayaw pangandoy sa himaya sa kalibutan kay ang matuod ug wala’y katapusan nga himaya anaa ra gayud sa Ginoo ug kana iyang gisaad didto sa mga tawo nga matuod nga nagpakabana alang sa iyang isigkatawo. (Filomeno C. Leyson, Public Information Officer, LGUI-Barili)