Ayaw'g basola si Pacquiao

Mayra gyud nga wala ko mosulat sa akong tagna sa away ni Manny Pacquiao ug Juan Manuel Marquez. Kay kun misulat pa ako para sa akong kolum niadtong miaging Domingo, usa unta ko sa nasayop.

Ako man gud nga pangagpas nga motikangkang gayud si Marquez sa ilang away ni Pacquiao. Gani nagtuo nga dili kaabot si Marquez sa ikawalo ka round ug ma-knock out gayud kini.

Sa wala pa ilang katapusang sangka, usa ko sa naglagot sa mga pasingit ni Marquez nga iya kunong napildi si Pacquiao sa ikaduha ka higayon. Sige pa siya’g suot og T-shirt nga nag-anunsiyong “I beat Pacquiao twice.” 

Gani mianhi pa siya sa Pilipinas nga nagsul-ob sa maong T-shirt ug sige’ng panghagit ni Pacquiao. Maayo na lang kay wala mirebenta ang mga Pinoy samtang dire siya. Hingamigo man gud kita ug maayong morespetar sa atong mga bisita. Kabahin kini sa atong kultura. 

Apan puwerte nakong sayopa. Wala lang diay maka-survive si Marquez hangtud sa ika-dose ka hugna, daghan ang miingon nga klarong siya ang midaug sa katapusan nilang kumbati didto sa Las Vegas, Nevada.

Nahimong kontrobersiya na usab ang away. Human sa 12 ka hugna, si Pacquiao ang gidapigan sa mga judge pinaagi sa usa ka majority decision. Apan kadaghanan sa nakakita sa maong away didto sa MGM Grand Arena midapig sa Mehikanong si Marquez.

Hinuon makasabot kita tungod kay mas daghan ang mga Mehikanong misaksi didto kay sa mga Pilipino. Natabunan ang mga hugyaw sa mga Pinoy nga misaksi sa sabang siyagit sa mga fans ni Marquez.

Bisan pa man, wala magpadala ang mga judge. Sa ilang nakita, midaug gayud ang Pilipinong kampiyon. Ug insakto lamang tungod kay base sa statistics, si Pacquiao gayud ang midaug.    

Apan mao lagi, sa atong pangagpas nga ma-knockout si Marquez, daghan na hinuon ang mibasol ni Pacquiao sa laing kontrobersiya sa resulta sa iyang kumbati ni Marquez. Kulang kuno siya sa stratehiya pagpalukapa sa iyang tang-ang kontra nga Mehikano. 

Grabe na hinuon nga nakatiyabaw ang kampo ni Marquez nga siya gayud ang tinud-anay nga midaug. Kay kun na-knockout pa ni Pacquiao si Marquez, motagam na unta siya karon.

Dili usab angay nga atong basolon si Pacquiao. Lisod gayud nga kaatbang si Marquez. Tanang kontra ni Pacquiao, si Marquez pa gyud ang labing lisod. Ug makita man usab sa ilang mga away.

Hinuon gusto kong adunay ikaupat nga sangka aron makita na gayud ang katag ni Marquez. Dako akong pagtuo nga ma-knockout na gayud ni Pacquiao si Marquez sa sunod nilang sangka.

Apan sa dili pa kana mahitabo, anaay hambogirong si Floyd Mayweather Jr. ang angay’ng unahon niya’g tikangkang.       

* * *

Akong gipahibalo ang mga sakop sa Alpha Theta Omega (ALTHONIANS) dinhi sa Sugbo ug sa Kabisayaan nga duna kitay   selebrasyon sa atong anibersaryo karong Nobiyembre 27.

Kadtong buot moduyog sa atong selebrasyon palihug lang kontaka si Brod Irlito Piamonte sa 09086896427, Brod Jun Epe sa 09053856919, si Brod Kenneth Sabanal sa 09174241879 ug Brod Ricky Veloso sa 09107737257. 

Puwede usab kamo nga mokontak kanako pinaagi sa akong e-mail address.

* * *

Email: [email protected]