Lunop sulbad na ba?

Tan-awon nato og masulbad na ba ang paglunop diha sa dalan Sikatuna sakop sa barangay Parian sa panahon nga dunay uwan.

Gibuhatan na og drainage system ang maong lugar pinaagi sa contractor nga gikontrata sa Department of Engineering and Public Works (DEPW) apan dili pa ko makapaneguro nga wala nay lunop diha.

Luoy lagi kaayo ang tag-iya sa pipila ka balay nga anaa daplin sa Sikatuna kay panahon sa uwan taga tuhod ngadto sa paa ang giladmon sa tubig nga ilang masinati nga mosulod sa ilang balay.

Mga 20 ka tuig na kapin nga ang maong dapit maglunop g’yud kun mag-uwan apan gipasagdan lang, wala g’yud matagad. Kaniadtong 1994 naglunop na ang karsada diha.

Ang motor nako niadto Yamaha v-50 pa nga gamay kaayo, maguwang lang sa gihabugon sa kanding. Mipugos ko paglagbas sa tubig nga milunop na sa karsada aron makaabot sa among opisina diri sa D. Jakosalem. Sa kalawom lagi sa tubig napawong ang makina sa motor ug napugos ko pagtukod sa akong tiil. Pastilan, dimalas g’yud kaayo kay ang akong tiil didto g’yud matumong sa manhol nga walay tabon.

Nalukapa intawon ko ug nakapanglimog-mog kadiyot og tubig-baha tungod sa pagpabaya sa atong mga opisyal sa ilang katungdanan. Kun mag-uwan gud, wala kay laing kaagian.

Kun adto ka agi sa Junquera kusog usab ang tubig inig-abot nimo sa Sanciangko ug maglunop usab ang Colon. Kun ari ka sa Sikatuna inig-abot nimo sa Bonifacio Street lawom na ang tubig. Pananglit adto ka moagi sa M.J. Cuenco mosamot na ka lawom ang tubig. Mahimong ari ka moagi sa Osmeña Boulevard kun gikan ka sa uptown, apan dili ka usab makalabang sa lawom nga tubig inig-abot sa Manalili Street.

Kini maoy dugay na kaayo nga pangindahay sa katawhan nga tagdon na unta sa atong mga opisyal ang problema sa drainage. Unta, kay sugdan na man sa konseho ang pagtuki sa gisugyot nga gastohanan sa Annual Budget 2012, maayo unta og tutokan kini sa mga konsehal.

* * *

Dili maayong dugay-dugayon sa mga konsehal ang pag-aprobar sa ordinansahon nga gisugyot ni Konsehal Augustus Pe Jr. nga naglatid nga ang mga rebentador adto ra g’yud ibaligya sa SRP. Kun maglangan-langan sila hayan nga wala na’y pulos ang maong ordinansa kay Disyembre na gud. Ang ordinansa kinahanglan pa nga ipublikar unya mapatuman kini human sa 15 ka adlaw.

Pananglit aprobahan nila karong Miyerkules, unya hinay kaayo’g lihok ang mga kawani sa City Hall, modagan pa’g pila ka adlaw usa kini mapirmahan sa mayor. Unya ipapublikar pa sa mantalaan ang bag-ong ordinansa aron mahibaw-an sa katawhan, mosamot og kalangan. Paminaw nako, mora’g apiki na kaayo sa panahon. 

Husto ang giawhag ni Vice Mayor Joy Augustus Young nga angay’ng magtinabangay ang mga abogado diha sa konseho paghashas sa gisugyot nga ordinansahon aron wala nay daghang langan. Sukoa lagi ni Konsehal Jun Pe nga gikuti-kuti ni Konsehal Sisinio Andales ang gisugyot niya nga ordinansahon. Kun malangan gud, mahuman na lang ang pasko dili pa ikapatuman ang maong ordinansa.

Buot ni Pe nga maaprobahan na karon ang ordinansa sa layo pa ang Pasko aron nga magamit kini nga basihanan batok niadtong mga tawo nga moinsister g’yud pagpamaligya og pabuto gawas sa SRP. Wala man gud makatubag si Pe sa pangutana ni Andales kun ubos sa gisugyot niya nga ordinansa maisip ba nga kalapasan ang paghupot og pabuto gawas sa SRP.