Barato apan peligro

Matud pa sa uban, daw walay kinabuhi ang usa ka Christmas tree kun wala kini series lights nga maoy mohatag og kolor ug kahayag niini.

Apan nasayod ba mo nga ang maong gamay nga butang nga maoy naghatag og kinabuhi sa matag Christmas tree ug sa mga adorno nato sa panimalay alang sa pagpangandam sa Pasko naghatag og dakong peligro sa sunog ug uban pa nga posibleng disgrasya?

Kun atong kuhaon ang datos sa atong kabomberohan, kasagaran gyud sa rason sa mga sunog karong naghinangat na ang Pasko mao ang pagkuyanap ug paggamit sa mga substandard nga series lights.

Gani subsob ang kampanya sa mga ahensiya sa gobyerno sama na lang sa Department of Trade and Industry kon DTI uban sa among ahensiya ang Bureau of Fire Protection (BFP) sa paghimo og inspeksyon sa mga establisemento nga namaligya niining maong mga series lights.

Gani hasta diha sa mga sidewalks ug sa mga gagmay nga tindahan wala usab palabya sa pag-inspeksyon. Ug sa naandan daghan lang gihapon ang nasakpan nga namaligya og mga substandard nga series lights nga mapalit sa barato kaayo nga presyo.

Ambot og nganong daghan man gihapon ang motangkilik niining maong baratohon apan delikado kaayo nga series lights nga kun buot hunahunaon wala man kami magkulang sa paghatag og pahimangno sa dili pagpalit niini.

Sa makadaghan nang panahon among gipahibaw ang publiko nga adto mopalit sa mga dagkong tindahan ug malls ug kinahanglan nga tan-awon kun duna ba kini tatak nga ICC kon Import Commodity Clearance diin nagpasabot kini nga pasado sa DTI ang kalidad sa maong series lights.

Dugang kasayuran sa publiko nga aron masuta ninyo nga orihinal ba ang maong tatak, pwede ninyong paksiton ug sa dihang pagtangtang ninyo sa maong selyo mipilit pa ang mga nakatatak niini nagpasabot nga orihinal kini. Ang timailhan sa peke kay igo lang kining gipapilit daw sticker ug wala kini mga serial number.

Dili kita angay mokompyansa anang mga butanga sanglit ang atong paggamit sa maong baratuhon nga series lights nagtangag man og hulga kanato. Mag-unsa man ang barato apan maoy mougdaw sa atong panimalay? Lisod ning mag-Pasko ta nga diha lang ta mag puyo sa evacuation center.Busa kusganon namong gi-discourage ang publiko sa paggamit sa maong mga substandard nga series lights ug uban pang de-kuryenteng dayandayan.