Ang disclosure bill ni Drilon

Sige ta’g hisgot og transparency kay lagi ang public office is a public trust, apan kutob ra ta sa hisgot, kutob ra sa mga speeches ug mga press releases. Daghan diay kita’g wa’a mahibaw-i, ug mao pay atong ikahibawo sa higayon nga duna nay mga anomaliya nga ma-exposed.

Maoy hinungdan nga midason kita sa balaudnon ni Senador Franklin Drilon nga mag-require sa local government units pagpaskin sa mga dapit nga dali rang makit-an, sa ato pa, dili itago, ang summary sa tanang revenue nga na-collected, appropriations, ug disbursements, ingon man, mga gasto nga covered sa budget, unsay gigastuan sa pork barrel, pilay share gikan sa Internal Revenue Allotment, ug ubang kasayoran nga angay masayran sa publiko.

Nindot ni kun mahimo nang balaud. Sa ato pa, kinahanglan masayod ang lungsod diin ug asa paingon ang kwarta sa katawhan, tua ba paingon sa pagpamalit og brand new nga mga kotse, unya, di gani ta kapalit og mga gloves o boots alang sa mga basurero, kay kinahanglan unahon ang kaprisyo sa mga opisyales, o tua ba paingon sa pagpamalit og mahalon nga mga cellphone, alang gihapon sa mga opisyales. O gigamit ba sa paglulinghayaw o pag-junket sa atong mga opisyales gawas sa nasud?

* * *

Padayon ang corruption. Niay kang Neal Cruz sa Inquirer, atong kutloon:

“Do you know that Manila Water and Maynilad Water have collected from consumers more than P4 billion in additional charges to finance ghost water projects?”

Bida sad uy, kun tinuod man, mora mag dili na ta mahadlok ug di na mauwaw mangawat!. Pagkakaron, mo mag wa pay uno si Presidente Noynoy sa kampanya pagpitol sa corruption. Mao nga in the meantime, hirap-hirap lang una ta, hangtud nga mabuntog na gayud ang kagaw sa corruption nga mitakboy sa atong nasud.

Hinoon, di man ni madali kay grabe na kining nakagamot sa atong kaugatan. Nagkinahanglan kini’g major operation.

* * *

Niay mga insights bahin sa RH bill, uyon o supak ka ba: “Addition o condoms implies a banalization of sexuality which is precisely the dangerous source of the attitude of no longer seeing sexuality as the expression of love, but only a sort of drug that people administer to themselves.”

Unya, somebody said: “You cannot solve the AIDS problem by distributing condoms.” Ug sa iyang bahin, si George Akerlof, usa ka Nobel Prize winner, sa iyang research ug mga pagtuon nga gihimo, nakita nga: “contraceptives lead to more extramarital sex, more fatherless children and single mothers.”

Sa ato pa, patuyang sa pakighilawas sa dili mga minyo, modaghan ang mga pinaangkan - walay klarong mga amahan, ug modagsang ang mga inahan nga walay bana.Mao ni ang gusto nimong mahitabo sa atong mga pamilya, Dro?