Banay'ng Rallos gibaraw sa COA

Ang mga sumusunod ni Fr. Vicente Rallos dili makaimbargo kon garnish sa mga deposito sa banko ug kabtangan sa Cebu City aron mabayran ang P133 milyones tungod sa paggamit niini sa yuta sa mga Rallos nga gihimong dalan sa siyudad.

Kini ang unod sa tubag ni Commission on Audit (COA) 7 Regional Director Delfin Aguilar sa suwat-pangutana ni Mayor Mike Rama kalabut sa mga paninguha sa pamilyang Rallos sa pag-garnish sa salapi sa siyudad nga gideposito sa nagkalainlaing banko ug karon ang pagbaligya sa yuta sa South Road Properties (SRP).

Ubos sa Administrative Circular No. 10-2000 nga gi-isyu sa Korte Suprema giklaro niini nga ang prosecution, enforcement ug satisfaction sa bayranan sa estado kinahanglang pinasubay sa rules and procedures nga gimbut-an sa Presidential Decree No. 1445 nga gitawag og Government Auditing Code of the Philippines nga nagbuot nga ang tanang money claims batok sa gobiyerno isang-at usa sa COA.

Kun mao nganong wala man masayud ang mga abogado sa pamilyang Rallos niining maong Presidential Decree? Sa laing bahin, nganong magdalidali man gayud ang ubang mga konsehal nga bayran na dayon ang mga Rallos? Duna bay nagpahipi nga katarungan niini?

* * *

Maora'g gipaboran si Mayor Mike ni Pres. Aquino karong panahona. Una niini mao ang pagtudlo ni P.Noy kaniya isip chairman sa Central Visayas Regional Development Council (RDC 7). Gisundan kini sa pagsuspenso sa katukuran sa duha ka flyover. Bisan kun si Department of Public Works (DPWH) Secretary Singson maoy nagsugo niini apan dili katuhuan nga wala siya hatagi og go signal sa presidente.        Ang Technical Working Group (TWG) sa RDC-Infrastracture Development Committee (IDC) ni-indosar usab nga hunongon usa ang pagtukod og mga flyover kun wala pay comprehensive master plan.

Samtang mipabor na kaniya ang COA kalabut sa Rallos claim akong gipaabot ang resulta niining iyang gipangayo'ng paghulip kang City Treasurer Tessie Camarillo.

Dakong kadaugan ni Mayor Mike batok sa Bando Osmeña-Pundok Kausaban (BOPK) kun mahulipan si Camarillo kang Asst. City Treasurer Emma Villarete.

* * *

Kinahanglang mohimo'g subsub nga representasyon ang mga kongresista ug mga pangulo sa Local Government Units (LGU) ngadto sa DPWH aron matuman ang ilang mga proyekto.

Bisan kun ang mga proyekto ma-aprobahan na sa RDC matangtang kini sa listahan sa priority projects sa DPWH kun dili mangisug ang mga kongresista ug mga LGUs aron mapatuman kini.

 Ehemplo niini mao ang Hernan Cortes Ave. nga ikaduha nga priority project sa DPWH ug gipaabot nga makarga sa budget karong tuiga. Apan ang dakung kahibulongan kay napapas na man hinoon kini gikan sa nag-unang mga proyekto. Bisan unsa na lang ang katarungan sa DPWH. Mao usab ang flyover sa Lapu-Lapu City sa tumoy sa unang taytayan.

Ang akong ikatambag sa mga kongresista mao ang pagkwelyo sa DPWH panahon sa budget hearing kay mahadlok man sila nga malaslasan ang ilang gahin.

* * *

Maghugpong ang RDC Full Council sa petsa 18 karong buwana adto sa Tagbilaran, Bohol. Panahon na kini nga makabisita ako sa Loboc nga kanunay nga gipropaganda ni RDC Co-chairman Argeo Melisimo. Sumala ni Melisimo nga world-class tourist attraction na ang Loboc. Of course, tungod kini sa iyang paninguha.

* * *

Email: [email protected]