Ang kontra ni P-Noy

Kabahin na sa demokrasya ang pagsaway sa mga kritiko sa gobyerno sama sa administrasyon karon ni P-Noy. Bisan pa sa gipakitang sensiridad ni Noynoy sa pagpauswag sa atong ekonomiya ug paglumpag sa grabeng kurapsyon sa atong nasud nga maoy nahimong rason nga nagbaguod kita sa kalisdanan ilabi na ang mga kabos, wala ug tuo pa gihapon ang nadawat sa iyang administrasyon nga pagsaway gikan sa iyang mga kaaway sa politiko.

* * *

Ingon niini ang sistema sa politika dinhi sa atong nasud. Bisan si kinsa pa ang molingkod sa Malakanyang dili gayod mahanaw ang mga kritiko. Usa kini sa atong matawag nga makaayo sa demokrasya nga nasud sama dinhi sa Pilipinas. Masayod ang katawhan sa mga anomaliya nga gibuhat sa gobyerno. Isip usa ka presidente, anaa ang gahom ni P-Noy nga mobuhat sa bisan unsa nga iyang gituhoan nga makaayo sa nasud ug sa katawhan Pilipino bisan pa kon supakon siya sa mga kritiko sa iyang administrasyon. Dili sila matawag nga higpit nga kaaway ni Noynoy, kay sa sistema sa atong politika “no permanent friend, no permanent enemy.”

* * *

Ang higpit nga kaaway ni Noynoy mao ang kinaiyahan. Kun mamungot ug moatake ang kabangis sa kinaiyahan, magbilin kini og dakong kadaot sa agrikultura ug imprastraktura. Ug ang dakong maapektohan mao ang mga mag-uuma ug mga dalan nga gisugdan na unta sa pagpalig-on sa karong gobyerno.

Ilampurnas ang mga tanom sa bagyo ug baha. Mangaukal ang mga semento ug aspalto sa karsada. Mokunhod ang ani sa mga tanom, maglisod na usab sa pagbiyahe ang mga mag-uuma alang sa pagbaligya sa gamay nga abot tungod sa pagkaguba sa mga dalan.

Karong bag-o, dakong kadaot ang gibilin sa bagyong Mina ilabi na gayod sa Northern Luzon. Laoman nato nga aduna pay laing mga bagyo nga magsunodsunod sa pag-atake dinhi sa nasud.

Kinahanglang dawaton sa gobyerno ni Noynoy nga ang mga katalagman nga mahiabot sa atong nasud ilabi na ang mga bagyo nga makamugna og pagbaha, usa sa dakong babag sa pag-uswag sa atong ekonomiya. Angay lang gayod nga hatagan kini sa dakong pagtagad sa pagsulbad.