Ang isyu bahin sa vigilante nabanhaw na usab karong may pipila na ka timaan nga ania na usab ang mga vigilante sa atong palibot.
Apan ang nailhan sa publiko nga basta vigilante, mga sakop kini sa kapolisan kansang misyon mao ang pagpuo sa mga tawong badlungon sa katilingban.
Apan di lang kay simpling badlungon ang sumpoon sa mga vigilantes kundi kadtong mga tawo kinsa maisip nga dakong hulga sa kinabuhi sa mga tawong inosente.
Tulisan, manlulugos, abusado, ug labaw sa tanan, tigpayuhot og drugas aron ihilo sa mga isip sa mga inosenteng tawo aron mayabag ug mahimong banggiitang kriminal mao kini matang sa mga tawo nga gustong sumpoon sa mga vigilante kun ang iyang ginikanan ug mga otoridad sa balaod di makasumpo kanila. Maoy hinungdan nga bisan ang mga dagkong opisyal sa kapolisan nagtuo nga ang kaluya sa tuyok sa ligid sa hustisya maoy hinungdan nga gusto lang sa mga biktima nga kumkomon nalang sa ilang kamot ang balaod aron maoy mohatag og hustisya niadtong mga nagpangita niini nga gihikawan sa hukmanan.
Hinuon sa mga tawong wala makatilaw sa kabangis sa mga tawong kriminal, kansang mga biktima gihikawan sa korte sa gipaabot niining hustisya, aw sakitan sila kun may vigilante nga manalipod sa mga dinaugdaog tungod kay wa sila katilaw sa maong panaugdaog.
Usa ang anaa sa ilang hunahuna, nga ang mga dautang tawo may panahon pang magbag-o sa kinabuhi, busa di sila angay nga puohon. Apan kumosta ang ilang gipatay, gilugos, gitulis, gihimong buang pinaagi sa gidiling drugas nga ilang gibaligya, gihuna-huna ba sa maong kriminal ang kaugmaon sa ilang gibiktima?
Mga pangutana kini nga matubag lamang kun pabor ka o supak sa presensya sa mga vigilante, samtang sa mga matawag nga neutral nga grupo, maghuwat sila kun kinsay mokumbinsi kanila ang pabor? O ang supak? Di ba?