Pagdagsang sa computer game

Wala na tingali dapit karon sa nasud nga wala’y mga computer game, nga maoy nahimong kalingawan sa mga bata labi na sa mga estudyante. Kining maong kalingawan maoy usa sa gihimong hinungdan nga nagyabag ang usa ka estudyante o pupil sa iyang pagtungha, nga inay mosulod sa eskuylahan, atua na hinuon magyampungad sa kompyuteran. Inay magtuon sa iyang mga leksyon sa balay panahon nga wala’y klase, nagduwa hinuon sa computer.

Lisud ma-monitor sa mga ginikanan ang anak o mga anak sa matag adlaw kay nangita mag kapanginabuhian. Tinuod nga ang mga ginikanan ang mopitol sa anak sa dili maayong kinaiya. Apan unsaon man kini sa paghimo sa mga ginikanan nga adlaw tanan atua sa trabaho, o unsa pa diha nga pangita alang sa mga panginahanglanon sa inadlaw diha sa panimalay?

Makaayo sa kaugmaon sa bata diha sa iyang pagtungha ang pagtinabangay sa mga ginikanan ug sa mga opisyal sa komunidad. Dili man tingali lisod nga magpalabang og ordinansa ang konseho sa matag komunidad aron dili magyampungad kanunay ang estudyante o pupil sa kompyuteran ilabi na sa panahon sa tingklase.

Makalingaw man gyud tinuod sa mga bata o sa mga ten-edyer ang mga computer games. Nasayod na kita nga gusto gyud sa mga batan-on ang mga kalingawan. Ug makasinati sila niini diha sa kompyuteran.

Daghan na sa mga pupil o sa mga estudyante nga nahunong sa pagtungha kay nangahagbong sa ilang mga subjects tungod sa kanunay nga pagdula sa computer. Dili na kini bag-o kanato. Apan hangtod karon, problema pa gihapon kini sa mga ginikanan. Ang uban pa gani, nagbalik-balik lang sa pag-eskuyla sa elementarya o kaha sa hayskol kay mas dako pa sila’g panahon nga gigahin sa komputeran kay sa tulonghaan.

Dili makontrol ang tag-iya sa computer game kay pangita man usab nila kini. Ang angay kontrolon mao gayod ang mga pupil o mga estudyante nga dili angay magyampungad sa kompyuteran panahon sa tingklase. Ug mahitabo lang kini kun adunay ordinansa sa matag komunidad nga ma-implementar alang niini. Ug angay usab nga estrikto kini nga i-monitor sa mga gitugyanan niini.

Anaa ra gayod sa pagtinabangay sa mga ginikanan ug mga opisyal sa komunidad ang pagkontrol sa mga pupil o estudyante nga dili magkanunayan sa kompyuteran panahon nga adunay klase.