Sakit usahay ang pakigrelasyon. Nagtuo ka nga imo na siya ug ikaw alang na gyud kaniya. Apan bisan unsaon pa nimo og pagbinuotan, dili kini paigo nga sukaranan nga magkadayon gyud kamo. Ang naandang kainit mabaslan naman hinuon og kabugnaw ug kawalay lami.
Sama gud sa kainit unta sa gugma nga gihatag sa Dios kanato, nga sa matag higayon nga ang tawo nagpakasala, sama ra nga ato Siyang gibaliwala. Ug bisan pa man kun siya atong gibaliwala, padayon gihapon siyang nipakita sa iyang kainit ngari kanato.
Sa matag higayon nga ikaw mosulod sa usa ka commitment ug diin adunay mga higayon nga nakasinati ka og kapakyasan, ayaw pagmahay kay sama ra nga gibasulan mo ang paghatag mo sa imong gugma. Dili angay ikaguol bisan pa man sakit nga napakyas ug nasagmuyo ka sa kinabuhi. Hinunoa, ang kapakyasan usa ka timailhan nga nahimo kang tinuod ug hamtong diha sa pag-angkon nga dili diay hingpit ang kinabuhi. Ang mahinungdanon mao ang malahutayong panaw uban sa imong gihigugma.
Kun ang Dios wala mobiya kanato wala’y katarungan nga motalaw kita. Kay ang kinabuhi dili lang kutob sa paglampos kun dili apil usab niini ang pagkamatinud-anon. Matud pa bitaw nila: The best love story is not about Romeo and Juliet who died young together but that of Grandma and Grandpa who grow old together. Kun dunay nagpatagad, tagda, ug kun dili ka tagdon sagdi lang. Ang mahinungdanon nga imo gihapon siyang gihinumdoman.