Bati-a sa mga balita nga atong mabasa sa mga mantalaan ug madungog sa radyo/tv ning mga adlawa. Ngano man ni oy, Nang Sebia?
* * *
Si Nang Sebia lab-asera kini nga suheto sa tanang balita, lakip na mga tsika-tsika. Hinuon usahay sayop ang interpretasyon gumikan kay medyo bungol ang usa ka dunggan niini.
* * *
Wa pa gani masakpi ang tinuod nga killer ni Ram Revilla nigawas na sad ang balita nga ang iyang inahan gilambigit sa iyang kamatayon. Dili kini gikan ni Nang Sebia lab-asera. Gikan gyud ni sa usa ka tv station.
* * *
Laing bati nga balita ning semanaha mao ang pagpusil kang PBA star Ali Peek. Kadaghan dihang mga tawo nga angay pusilon nganong si Ali Peek pa? Naigo si Ali sa tangkugo ug hangtud karon iya pang gidada ang bala sa iyang ulo.
* * *
Matud pa nga holdapon kuno unta si Ali Peek apan sa iyang paglingi ngadto sa holdaper gikuyawan kini tungod sa kadako ni Ali, mao nga gipusil nalang niya ang giilang Man Mountain sa PBA ug mikaratil og dagan.
* * *
Laing bati nga balita akong nadungog sa report ni Erwin Tulfo sa TV-5. Usa ka amahan migapus ug misud sa tangkal sa baboy sa iyang gamay’ng anak nga dili husto sa pangisip. Wala hatagig pagkaon gawas sa dahon sa kamunggay nga gipasibsib sa pobreng bata.
* * *
Dia pa gyuy lang bati nga balita. Ang amahan ni Charice Pempengco, ang international singing sensation, gidunggab patay samtang nipalit lang kuno og yosi kon sigarilyo. No, dili kini rason nganong gikaingon nga ang pagpanigarilyo makamatay.
* * *
TRIVIA -- Greetings diha sa atong mga higala sa merkado sa Toledo City ug sa mga kawani sa mayor diha sa city hall. Daghan salamat sa inyong suporta sa Banat News.