Ipatuman g'yud ni ha?

Angay’ng daygon nato ang mga private persons nga mga technical experts nga migahin sa mahinungdanon nilang oras aron pagtoon kun unsaon pagtabang ang mga opisyal sa dakbayan sa Sugbo pagsulbad sa problema sa paglunop ug pagbaha dinhi sa atong dapit.

Ang pundok nga gitawag og Water Crisis Management Committee nga gipangulohan ni Engr. Julito Roden, ang tag-iya sa Roden Construction og opisyal sa Cebu Contractors Association, mipresentar na kagahapon sa ilang output.

Dunay mga rekomendasyon alang sa “long term solution” sa problema ug duna sa’y “instant solution.”

Ang gisugyot nga sulbad sa malungtaron nga paagi mao ang paghawan g’yud sa atong kasapaan ug pagpalapad niadtong mga sapa nga migamay na tungod sa kamapahimuslanon sa atong ubang kaigsuonan nga naghimo’g balay diha sa sapa.

Kay nagkinahanglan man kini og “political will” ang pagpangguba sa mga illegal structure nga gitukod sa kasapaan, gisukna nako si Engr. Pedro Adonis Compendio, ang vice chairman sa maong kahugpongan kun sa tan-aw niya may political will ba ang mga opisyal sa dakbayan.

Nakapahiyom ko kay si Engr. Compendio wala gayud makahatag og tukma nga tubag kun sa iyang tan-aw may political will ba nga mopatuman sa pagpangguba sa mga illegal structures, ilabi na kun naglambigit sa mga dagkung tindahan ug mga idipisyo sa mga datu.

Ang pagpangguba gud sa mga balay nga milapas na sa “three-meter easement” gikan sa tampi sa kasapaan nagkinahanglan og political will ug mahimo ra kini niadtong mga tawo kang kansang panglantaw mao ang pagserbisyo sa katawhan nga wala maghuna-huna kun modaug pa ba siya sa sunod eleksyon.

Kabahin ni Mayor Mike Rama mora’g nagduha-duha pa ko kun iya ba kining mahimo, ilabi na nga nagpasuwabi man ni Rama ang kamaayo niya og batasan.

* * *

Gipasabot usab ni Engr. Compendio nga ang “instant solution” nila sa maong problema sa paglunop-baha mao ang pagbutang og mga makina nga mosuyop sa tubig-baha unya ibuga kini ngadto sa sapa. Gisukit-sukit nako niining bahina si Engr. Compendio kun unsaon pagpatuman ug ang gihimo nako nga sanglitanan nga kun mahitabo paglunop ang dapit sa North Reclamation Area, duol sa SM, unsaon nila pagsulbad.

Sa laktud wala kaayo ko makombinsir sa iyang pagpasabot. Magbutang kuno sila og duha o tulo ka dagko nga makina nga kusog mosuyop og tubig aron mohubas ang tubig-baha. Sa kakusog sa bul-og sa tubig nga moawas gikan sa sapa, kuwang ko og pagtoo nga ang pagbutang og “suction pump” makasulbad sa problema.

Gikuyawan ko nga kutob ra kita sa pagplano apan sa ngadto-ngadto mahikalimtan ra ang pagpatuman sa mga maayong sugyot.

Apan walay mawala kanato kun kitang tanan motabang alang sa kalampusan niining maayong tumong sa grupo. Basta kinahanglan nga ang atong mga opisyal mohiklin usa sa ilang ambisyon nga makadaug sa sunod eleksyon.

Ang katawhan nga maapektahan sa paghawan sa atong kasapaan ug paglimpyo sa atong mga drainage systems masuko g’yud, apan ang kinabag-ang katawhan mopagakpak sa kalipay.

Busa hagiton nato si Mayor Rama nga kay siya man ang nagmugna niining grupo nga gipangulohan ni Engr. Roden, angay’ng maninguha siya aron dili kay mausik lang ang ilang kahago.