EDITORYAL - Ang katungdanan sa ginikanan ngadto sa anak

Ang edukasyon sa anak usa ka sagradong katungdanan sa ginikanan, di lamang sa pagpalampos og kurso nga mahimo niyang profession dinhi sa yuta apan edukasyon sa pagpakat-on kaniya sa pag-ila sa Dios nga maoy naghatag kaniya og kinabuhi.

Ang pag-ila sa matuod nga Dios mahimo kaayo sa bata kun makakat-on siya sa pagtuman sa mga sugo sa Dios.

Busa kun ang ginikanan nagkinahanglang mopadala sa iyang anak ngadto sa eskuylahan alang sa kaalam nga para sa iyang profession ning yutaa, mas labi niyang gikinahanglang patudloan niya ang iyang anak sa magtutudlo nga suhito bahin sa mga pulong sa Dios nga magtudlo sa kaayohan sa kalag sa tawo ugma   damlag.

Tungod kay ang profession o panginabuhi sa tawo dinhi sa yuta kutob ra niining kalibotana, inigkamatay impas na ang tanan.

Apan ang edukasyon nga magkat-on sa usa ka tawo pag-ila sa Dios ug sa tanan Niyang sugo magluwas sa iyang kalag pag-abot sa adlaw aron makabaton siya sa kinabuhing dayon ug wa nay kamatayon.

Hinuon ang pagpili og magtutudlo aron ang anak makaila sa matuod nga Dios, di sama kasayon sa pagpili og magtutudlo sa eskuylahan sa akademya.

Karong panahona nagkadaiya usab ang mga magtutudlo kunohay nga motudlo kinsa ang matuod nga Dios   ug suwerte kaayo ka kun imong mapalgan ang way trampas ug tinuod nga magtutudlo sa mga pulong sa Dios.

 Kay kun mosipyat ka mao lang gihapon, magdako ang imong anak nga way kabangkaagan pag-ila sa matuod nga Dios busa wa siya’y hustong giya unsaon nga makapuyo siya sa gingharian sa langit nga Iyang giandam sa mga tawong miila Kaniya.

Kay ang pagsulod sa langit estudyohanan o eskuylahanan karon samtang buhi pa ang tawo, kay didto sa lubnganan di ka na makaalagad pa sa Dios busa ang paghatag kanimo og grado kun pasado   ka ba para sa langit o di, kutob ra sa katapusang gutlo sa imong kinabuhi.

Inigbangon nimo gikan sa lubnganan pag-abot sa adlaw gipiho na sa Dios kun asa ka mapunta, adto ba sa langit o sa impiyerno. Di ba?