Kapildehan ni Marquez dili pa maseguro

Ang kadaugan ni Pacquiao batok ni Marquez karong Nobiyembre 12, 2011 dili pa gayod nato maseguro. Kay sa akong pag-review sa una nilang away akong nakita nga si Marquez aduna gayo’y ikabuga. Gani sa ikapito nga hugna sa ilang away ni Pacquiao diriyot gayod matumba.

Ang akong puntos nga nakuha ni Pacquiao gumikan sa iyang pagtumba kang Marquez sa makatulo sa unang hugna inanay nga napapas gikan sa ika-unom ngadto sa ika-12 ka hugna. Hangtod nga si Marquez nakakuha gayod og “draw” batok ni Pacquiao.

Sa ika-lima nga hugna ang ilong ni Marquez naigo sa kumo ni Pacquiao. Hinuon, klaro ug tataw kaayo nga ang nagdala sa away mao si Pacquiao.

Ang nakaparat lang kay inig atake ni Manny kang Juan Manuel mabuklan siya kanunay. So kining umaabot nga away sa duha kulba gayod. Diyos lang ang nasayod kun kinsa kanila ang modaog.