(3b) Ang ehersisyo, mahinungdanon gayod kini sa kahimsog sa panglawas. Duna gihapon kini sukdanan. Kun maghinobra makadaut sab kini sa atong panglawas. Daghang lihok sa pag-ehersisyo. Gastoso na kun adto pa sa gym kay mag-erobik. Ang uban wa nay oras sa paugnat sa kusog ug magpasingot.
Ang labing sayon, kumon ug luwas nga ehersisyo mao ang piskay nga paglakaw. Mabuntag molakaw ka’g 30 minutos sa tulo ka kilometros lima ka beses sa usa ka semana. Agda nga hapit na mosilang ang adlaw, nga mainitan ka bisag 5 ngadto 10 minutos. Mao usab inigkahapon dayon nga igkasawop.
Samtang maglakaw, mag-estorya ka sa imong kaugalingon kun wa kay kuyog, o magtaghoy-taghoy o magkanta-kanta ka. Ang tuyo niani mao nga mapraktis usab ang imong maayong pagginhawa aron mahatagan ang baga nga makahanggap og daghang hangin o oksehena para molahutay.
Mas makaayo adto ka maglakaw-lakaw sa baybayong batoon o baason nga magtiniil. Maayo sab ka adto sa mga kakahoyan nga mahayagan sa init sa adlaw ang ilawom sa punoan. Ayaw sa dapit nga asohon, abogon o basurahan.
Kun wa gyud kay oras o gana sa paglakaw kay mahadlok sa gawas, mahimo sab, adto ka’s tugkaran ninyo maglakaw-lakaw sa palibot, magpiyong nga di malipong. Magginhawa’g lawom nga puli-pulihon ang ilong ug baba.
Alang niadtong dunay kakulian o masakiton og panglawas o edaran na, ug sa tanang mag-ehersisyo, duna kita’y giya o pormulario nga atong tamdan ang igo lang nga di masobraan sa pag-ehersisyo. Ato ning hisgutan sa sunod.