Pag-abot sa Pasko

Kun wala ninyo mabantayi bag-o lang kita nagpakli sa atong kalendaryo.Wala lang nato damha nahuman na kita pagsaulog sa Kalagkalag ug nagpasabot lamang nga tali abot na gyud ang Pasko.

Dili na gyud nato mapugngan ang pag-abot sa maong espesyal ug labing mabulukong adlaw sa tuig. Gani ang matag panimalay nakahimo na sa pagpangadorno niini ug ang mga malls ug dagkong mga establisamento nakabutang na usab sa mga dayandayan alang sa pasko. Kun inyong nabantayan dinha sa Fuente Osmeña circle gisugdan na pagmuntar ang labing taas unya nga Christmas Tree dinhi sa dakbayan sa Sugbo. Ug pagkahuman na unya sa pag-assemble sa maong Christmas Tree magsugod na dayon ang atong gitawag og Pasko sa Sugbo diin daghang mga kalingawan ug uban pang mga kalihokan nga ipahigayon sa maong lugar.Kay lagi nagkaduol na ang Pasko halos tanan nagkapuliki na sa pagpangandam niini ug wala magpaulahi ang inyong kabomberohan sa nangandam sa maong dakong kasaulogan.

Gani nagsugod na kini sa pagpakatap og mga mahinungdanon kaayong mga fire safety tips aron mamahimong luwas kita sa pagsaulog sa Pasko. Hinaut nga inyo kining hatagan og igong pagtagad.

1. Ayaw kamo pagpataka og palit og mga series lights kay mao kini ang kasagarang hinungdan sa sunog sa panahon sa Pasko. Ilabi na niadtong mga barato.

2. Kinahanglan nga i-switch-off ninyo ang tanang electrically lighted Christmas decors sama sa series lights, lanterns ug uban pa nga mga dayandayan kun molakaw ug kung matulog.

 3. Kun mobakasyon kamo, isiguro nga ang tanang appliances na unplug na ug walay nagpabiling nakasaksak. Mas maayo nga ipaubos ang plangka kun taastaas ang bakasyon aron hingpit kining luwas sa sunog. Isirado usab ang LPG tank valve.

4. Likayan ang pagpabuto ug kung dili kinahanglang hamtong ug dili bata ang mohimo niini o ba kaha mangita og laing paagi sa pagsabasaba nga way peligro ug luwas sa disgrasya. Mas maayong adto pabutha sa drums ug layo sa combustible materials ug dili puniton ang mikagar nga pabuto.

5. Kung sa inyong pagbanabana dugay na ug karaan na ang inyong electrical wirings sa panimalay mas maayong pailisan na kini og bag-o.

Angayan lang natong isipon nga kining mga tips mohatag ug mogiya unta kanato aron hingpit kitang luwas sa sunog ug disgrasya.

Sa pikas bahin, madungagan na unya ang pwersa sa atong kabomberohan dinhi sa Rehiyon 7 sanglit sa milabay nga semana gipahigayon man ang qualifying exam alang sa pagka Fire Officer 1.Sa atong kasayorang nakuha duol 40 ang bakante sa pagka FO1 ug sobra gatos ang nikuha sa maong examination nga gihimo sa Department of the Interior and Local Government-7 ug sa Bureau of Fire Protection- 7 personnel.