Pangilkil sa pantalan

Nagpa-uwahi ko pagkanaog sa fast craft gikan sa Tagbilaran City. Ang mga pasahero nga nag-una nako nagtapok sa dakong hawan sa Pier 4, pulos nagpaabot og kasakyan.Pila nila nilabang sa pikas nga daplin sa pantalan, namasin nga mas dali nga makasakay didto. Beterano na ko sa pagpangita og taxi sa pantalan.Akong kasinatian nagtudlo nga makasakay lang ko kun mosakwat sa akong bagahe ug magbaktas paingon sa Serging Osmeña Avenue.

Apan bag-o nang liderato sa Cebu Port Authority (CPA).Kabahin nako nanghinaot nga nahapsay nang sistema sa transportasyon.Maong nibarug ko sa ngilit sa pantalan.Nangaliya nga nahatagan na og kinutoban ang pait nga kasinatian sa mga pasahero sa barko.

* * *

Sa pila ka gutlo nakong pagbarug sa pantalan, may nakita kong mga taxi nga paspas nga nisud ug nituyo paghunong layo gikan sa nagtapok nga mga pasahero.Nagdinaganay ang mga pasahero sa pagduol. Apan kasagaran nila nisibog dihang giingnan sa mga drayber nga di sila mogamit og metro.

May mga pasahero hinuon nga nagdali.O layo tingali og destinasyon.Nga napugos pag-uyon nga patongan ang ilang plitehan.Way bisan usa ka guwardiya sa pantalan nga niduol sa mga taxi.Pulos nilingiw ug wa magtagad paghatag sa complaint forms nga gipanghambog sa kadagkoan sa CPA, Land Transportation Office (LTO) ug Land Transportation Franchising and Regulatory Board (LTFRB) nga igo nang sukaranan pag-imbestigar ug pagsilot sa abusadong taxi drivers.

* * *

Human nakumbinser nga wa mausab ang karaang binuang sa pantalan, napugos ko pagsakwat sa akong mga bagahe ug naghinay-hinay pagbaktas paingon sa gawas.Usa ka tawo ang niapas nako ug nitanyag nga may sakyanan siya kun magkasabot mi sa presyo.Way marka ang sakyanan nga iyang gitudlo, maong nipadayon ko paggawas.

Daghan nang pasahero ang nag-una nako.Gisugat sila sa mga taxi kansang mga drayber nagdumili sab paggamit sa metro.Ang mga guwardiya sa pantalan wa lang gihapoy gihimo.Gipasagdan ang naandan nga paglisudlisod ug pagpangilkil batok sa mga pasahero.

* * *

Dihang nagkaduol mi sa Serging Osmeña Ave., mas daghang taxi ang nangabot.May nisugat nga mga sibilyan, apil nang ambulant vendors, nga nitanyag nga maoy mangita og taxi alang namo.Nanawag ko og dakong kompaniya sa taxi.Natsambahan nga may taxi sila sa duol.

Ang taxi driver may ID gikan sa CPA.Gawasnon untang makasud sa pantalan.Apan gipagawas sa mga guwardiya kay wa pa moabot ang fast craft.Matod niya ang mga gitugotan pagpabilin sa pantalan mao ang taxi drivers nga way accreditation sa CPA apan nibayad sa mga guwardiya.

Nagduda ko paryente silang CPA General Manager Dennis Villamor ug Mactan Cebu International Airport (MCIA) General Manager Nigel Paul Villarete:Pulos sila ganahan nga mopaantos sa mga pasahero.

* * *

Email: [email protected]