Balaud wala tumana

Ang atong Sanitary Code of the Philippines naglatid nga dili tugutan nga may kabalayan nga tukoron 25 metros gikan sa mga menteryo.

Apan naunsa ba kini nga ang kabalayan mipidpid na man pag-ayo sa mga sam-ang ug daghan man gani ang anaa na gitukod sa sulod mismo sa menteryo. Bisan gani ang menteryo sa mga Insik may nagpuyo na nga mga squatters.

Gilatid usab sa maong balaud nga walay tinubdan sa tubig nga anaa sa sulod sa 50 metros gikan sa mga sam-ang. Gaduda gani ko nga dunay mga tinubdan sa tubig nato nga anaa sulod sa maong gilay-on.

Kinsay nagkuwang niini sa ilang mga trabaho? Ang mga kawani ba sa Department of Health? O ang mga opisyal sa mga local government units nga wala makapatuman sa gilatid nga lagda?

Gawas nga kining maong mga tawo anaa manimuyo sa mga menteryo, daghan pa kanila ang hugawan ug mao nga dili sila angay’ng papuy-on diha. Nahinabi nako ang caretaker sa usa ka lubong sa mga Insik gahapon.

Grabeha lagi, kada adlaw siya nga maglimpyo sa hugaw sa tawo nga kanunay’ng anha gayud sa kilid sa nitso. Dili ba bastos kaayo ang maong mga tawo? Maayo gani kay gitugotan sila nga mipuyo diha unya maghugaw-hugaw pa.

* * *

Angay’ng mauwaw si Mayor Michael Rama nga wala makapatuman sa iyang gipasiatab nga Oplan Hagibis, kampanya batok sa mga drayber sa motorsiklo nga habal-habal nga kanunay’ng nagsamok-samok sa trapiko diha sa rotunda sa Lahug.

Niining miaging mga adlaw, ang mga abusado nga drayber mibalik na usab sa naandan nilang kalihukan nga mao ang pag-standby sa ilang mga motorsiklo diha dapit sa eskena paingon sa Marco Polo Hotel.

Wala na ang mga sakop sa CITOM nga kaniadto diha gidistino aron mobadlong o kaha manakop sa mga abusado nga drayber, wala na ang patrol car sa traffic group nga kaniadto mokalit og sakdap diha aron dakpon ang malapason sa balaud.

Anaa man tuo’y duha ka polis nga gidistino apan tabla ra og “tawo-tawo” sa humayan kanang gitawag og pahoy kay ang ilang trabaho mao ra ang pagsigi’g baru’g diha sa rotunda nga walay gihimo. Maayo pa ang mga “pahoy” kay kahadlokan pa sa mga langgam nga moukit sa mga lugas sa humay, apan ang mga abusadong drayber sa habal-habal wala g’yud mahadlok kanila kay unsaon, dili man gani mobadlong.

* * *

Sa pagsugod sa Oplan Hagibis pipila ka semana ang nakalabay diin dunay gidistino nga traffic enforcers diha, mikalma ang mga drayber sa “habal-habal” sa ilang kaabusado.

Gani gidayeg nako dinhi sa atong lindog si Rama kay nahawan ang kanhi dapit nga anha sagad magpundok ang mga abusadong drayber sa mga PUJ nga motungas paingon sa Busay apil na ang mga drayber sa habal-habal.

Ang maayo ni Rama nga ang Oplan Hagibis itahas niya sa hepe sa traffic group ug sa CITOM. Nakasabot ko nga ang CITOM ug Traffic Group wala kaayo molihok kay naghuwat man sila sa kamandoan gikan ni City Administrator Jose Marie Poblete.

Nalooy na kaayo ko ni Poblete kay isip city administrator, pwerteng daghana sa iyang trabaho unya pun-an pa sa maong gimbuhaton kay siya man ang gitudlo nga lider sa Oplan Hagibis.

Ang maayong buhaton mao nga dunay sakop sa CITOM nga mosusi kun kompleto ba sa papeles ang mga motor nga gigamit isip habal-habal ug kun may lisensya ba ang nagmaneho niini.