Nagkasabot mi sa akong asawa nga mangadto og Bohol pagpahimus sa taas nga bakasyon sa Kalagkalag. Nagpalaban ko sa internet pagsusi sa dapit nga among kapuy-an. Natukmaan dayong resort nga dugay na nakong gustong suwayan. Gitawgan nakong ilang telepono. Ila kong gipahibawo nga may usa ka kuwarto silang bakante.
Nitanyag ko paghatag sa akong credit card number aron pagpa-reserve sa kuwarto. Nihangyo sila nga mo-deposito lang ko sa ilang bank account. Ako silang giingnan nga hasolan kong moadto sa bangko. Nisugot silang i-reserba ang kuwarto alang namo. Nipasalig silang magpada og van nga mosugat namo sa pantalan sa Tagbilaran. Nahingpit ang akong kahinangop sa pahibawo nga duna silay wifi.
* * *
Hangtod nga nasugatan nakong kalisod pagkuha og tiket sa barko. Ang nailhan nga fast craft niingon nga kinahanglang adto gyud ko magkuha og tiket sa ilang buhatan. May ticket outlets sila sa malls apan ang nakatubag nako wa kaseguro abli pa ba. Nidali ko’g pamalihog sa among kauban. Apan pasado alas-5 sa hapon na siyang nakaabot ug serado nang ticket office.
Nakahunahuna ko pagkanselar na lang sa among bakasyon. Nitagam na ko sa paglukat og tiket sa pantalan. Gawas nga way klaro ang linya ug sistema sa ticket offices, daghan pang binuang. Kausa, gibalibaran mi sa taga barko nga hurot nang tiket. Apan giduol dayon og taga gawas ug gitanyagan og tiket ug otap. Nga, nakatag-an ka, pulos pinaburot ang presyo.
* * *
Nagpalaban na sab ko sa internet. Usa ra ka fast craft ang dunay online reservation. Kinahanglan hinuon una nga magpa-rehistro. Di kaayo taas ang registration page, ug lahi sa ubang sites wa mangayo sa akong credit card number, maong nidalidali ko og palista.
Apan uwahi na. Kay modawat lang diay og reservation duha ka adlaw sa di pa ang biyahe. Maong wa na man gyoy laing kapaingnan, nagsamuksamok ko sa matinabangon namong tigpaminaw sa DYAB Abante Pa, Bisaya! nga may booking company. Kay gabii na man, wa siyang kaseguro duna pa bay bakante. Gikuha niyang daan ang among ngan, edad ug ganahang oras sa paglawig.
* * *
Pagkabuntag, gitawgan ko niya nga, bisan sa kadaghan sa mamauliay sa Bohol alang sa Kalagkalag, duna pay pipila ka lingkoranan nga bakante. Gipahibawo ko niya sa presyo sa duha ka roundtrip tickets ug gipapili asa nga outlet nako ipakuha. Siyay nakaluwas sa among bakasyon.
Ambot tungod tingali kay tagsa ra kong moagi sa dagat, o nabiyaan lang gyud sa panahon ang mga kompaniya sa barko, mas sayonan kong mo-book og flight sa ayroplano. Kasagaran sa mga kompaniya motugot pa sa mga pasahero pagpiling daan sa ilang lingkoranan online. Hinaot nga ang mga barko makaamgo nga ang kalisod paglukat og tiket usa sa nakapatibugsok nilang kita.
* * *
Email: leo_lastimosa@abs-cbn.com.