Angay buhaton sa bakasyon

CEBU, Philippines - Kinaiya na gyud natong mga pinoy ang paghandum sa atong mga minahal sa kinabuhi nga mitaliwan na ngadto sa laing kalibutan. Gani daghan na ang magpanon ngadto sa mga sam-ang aron bisitahon ang atong mga kabanay nga nag-una na kanato.

Bisan tinuod og sa petsa 2 sa Nobiyembre pa ang adlaw sa minatay dili na gyud ikalalis nga daghan na kanato ang mobisita og sayo sa atong mga relatives, higala ug mga yanong kaila ngadto sa menteryo.

Kung wa ko masayop halos tanang tawo sa panimalay mouban gayud, hasta gani ang atong mga katabang sa panimalay mananghid pod nga mo uli sa ilang probinsya aron pod mo duaw sa ilang minatay ug mobakasyon. Kay manglakaw man ang tanan ug wala nay ibilin sa panimalay, hinaut nga inyong masiguro pagsunod ang pipila ka mga pahimangno aron sa inyong pagbalik luwas kini sa mga kawatan ug sa sunog.

1. Una sa tanan, sa dihang mobiya na kamo sa inyong panimalay kinahanglan nga inyong masiguro og ibot ang tanang gipangsaksak nga mga appliances nga wala gamita. Mas maayo gani og pawngon tanang mga appliances ug walay ibilin nga nag andar ug dayong palong sab sa plangka.

2. Isigurado usab nga ang LPG valve inyong ma-off. Kun ugaling dunay hungaw, dili kini magpuot kay nakasirado man ang regulator niini. Mas labing maayo og ilisan nang daan ang hose kon inyong namatikdan nga duna kini hungaw aron masiguro gyud nga walay delikado sa atong pagbiya sa panimalay.

3. Daghan baya kanato ang magdagkot og kandila sa panimalay para pod lagi unta sa mga kalag nga libod suroy kay ilaha baya kining adlaw maong maglaroy laroy pod kini sila. Isigurado gyud nga sa inyong pagbiya inyo kining palongon aron hingpit nga layo sa sunog.

4. Mas labing maayo kung dunay mabilin nga tawo sa atong panimalay.

5. Aron hingpit pod nga makalikay sa operasyon sa mga akyat bahay nga mosiaw ning mga panahona, isiguro gyud nga naka-lock ang tanang pultahan sa panimalay. Ibutang og siguro ang iro sa atubangan sa pultahan aron magduhaduha ang mga sagbot sa katilingban nga mupahimos sa higayon.

Mas maayo man nga sa atong pagbiya o pagbakasyon kampanti kita nga luwas atong panimalay sa kadaot nga mamugna unya sa sunog. Happy Halloween!