Unsay imong Halad?

Sa makausa pa, mag-abot na sab ang mga tabanganan ug ang mga may katakos ug kasingkasing sa pagtabang. Atol sa laing hugna sa dakong piyesta sa libreng mga pangalagad. Ang sunod nga Grand Halad sa Kapamilya himuon karong Nobiyembre 12 sa main campus sa Cebu Technological University (CTU) sa M.J. Cuenco Avenue, Dakbayan sa Sugbo.

 Ang Grand Halad sa Kapamilya, nga nahimo nang taytayan nga nisumpay sa labing kabos ug masakitong mga Sugbuanon ngadto sa mga indibiduwal, kahugpongan ug mga kompaniya nga makapagaan sa ilang mga palas-unon, kun di man hingpit nga makahaw-as nila gikan sa pait nga kahimtang.

* * *

Gisuwat ni nako og sayo aron pagdasig sa tanang indibiduwal, kahugpongan ug mga kompaniya nga ganahang motabang sa pagkuyog sa Grand Halad sa Kapamilya. Aron mas daghan pang kinabuhi ang mahikap. Napamatud-an sa nangaging mga halad nga mas sayon alang sa katawhan ang pagpamiyesta sa tanang libreng pangalagad sa usa lang ka dapit ug higayon, inay nga magbalhin-balhin sa nag-iyahay, nag-ulhos-ulhos ug nagkatibuwaag nga kalihokan.

 Unsay imong ikatabang? Ang labing sayon mao ang pagtanyag sa imong katakos, produkto o serbisyo nga way bayad. Mahimo sang motampo sa pagpamalit og tambal ug ubang kahimanan sa pagtabang. O mohalad sa imong panahon isip boluntaryo sa pagduma, pagsakwat sa mga lingkoranan ug lamesa o pagbantay sa kahapsay sa kalihokan.

* * *

Labing gikinahanglan mao ang mga doktor ug nurses nga moatiman sa mga pasyente, mga dentista nga mangibot og ngipon, pharmacists nga manghatag og tambal, mga doktor nga mohimo og minor surgeries, mga doktor nga mosusi sa kahimtang ug mosukod sa grado sa mga mata ug mga tagduma sa nagkalainlaing laboratory services.

Laing dugokan sa labing daghan mao ang libreng laboratory services nga itanyag sa mga ospital, pribadong mga laboratoryo ug civic organizations. Gikinahanglan sab kaayo ang pagkaon alang sa gatosan ka mga boluntaryo sa kinatibuk-ang mga serbisyo.

* * *

Mahimo sang motanyag ka og libreng seminar o skills training alang sa labing mapuslanon nga mga natad sa panginabuhi. O mopaambit sa imong katakos sa pagtupi, pag-masahe, pag-reflex ug ubang mga pangalagad nga way bayad. O manghatag og pan, juice, ice cream, tubig ug ubang pagkaon.

Kun gusto kang motanyag og tabang, isip indibiduwal o representante sa kahugpongan o kompaniya, o mosugyot og libreng mga pangalagad nga wa pa namo matanyag sa nangaging mga Grand Halad sa Kapamilya matag Hunyo ug Oktubre matag tuig, palihug tawgi ang among Halad coordinator nga si Cheryll Barrios sa 4221954. O ba kaha ang DYAB Abante Pa, Bisaya! sa 4221950 ug 4221953. Mahimo sab nga mo-text ka nako sa 09175903518. Daghang salamat daan. 

* * *

Email: [email protected]