Pamaagi usbon

Tan-aw nako angay’ng pahugtan na g’yud ang lagda sa pagkuha og lisensya sa pagmaneho og sakyanan aron maminosan ang mga badlongon diha sa karsada.

Bisan ang mga tag-iya og passenger jeepney ingon man mga drayber nga nagpanawan sa Mandaue miangkon nga ang problema mao ang kalugak nga lagda sa pagkuha og lisensya.

Kami nga mga tigpatuman sa balaud diha sa kadalanan nasayud g’yud sa kaabusado sa daghang mga drayber. Sa gibalik-balik na nako, bisan ang pagsul-ob og uniporme, ang kamandoan nga dili magsinelas nga mag-drive, dili sila makatuman.

Ang lagda nga mopasiga g’yud sa mga suga sa sakyanan kun magpadagan sa karsada panahon sa gabii, wala kini tumana sa daghang mga drayber. Apil sa mga drayber nga dili motuman og lagda mao ang mga nagbiyahean sa Mandaue paingon dinhi sa dakbayan. Sa makadaghang higayon kaniadto nakakita g’yud ko nga babagan nila ang ganghaan sa Basilica del Santo Niño nga magpaabot og pasahero.

Tarung ba gud ang ilang gihimo? Unya karon mohangyo sila nga tugutan nga makabalik sa pagpamasahero dinhi sa kadalanan sa dakbayan? Sumala, pwerteng daghana nga mga sakyanan nga na-impound ug wala na malukat sa ilang mga tag-iya kay dagku na kaayo og multa nga nagtipun-og diha sa Traffic Violations Bureau.

Kun buotan pa ang maong mga drayber, madakpan kaha sila sa makadaghan nga higayon? Ang balaud gud nato mao nga wala may educational qualification ang mamahimong drayber.

Nindot g’yud unta kun ang Land Transportation Office (LTO) moestrikto nga ang tanang madakpan mag-agi g’yud og seminar sa dili pa ibalik ang lisensya sa madakpang drayber.

Duna man go’y mireport nako nga tungod sa mga bilyako usab kaayo nga kawani sa LTO dunay mga higayon nga ma-release ra gihapon ang mga lisensya sa drayber bisan og wala sila motambong og seminar.

Tungod niini, dili mahadlok ang maong mga drayber nga mohimo’g salaud kay madala ra man og kwarta. Sayonan ka, daghang mga drayber nga among madakpan magpakilooy nga dili lang sila dakpon kay bag-o pa nga nalukat ang ilang lisensya.

Kun ako ang matumngan niini, mosamot nga akong sakmiton ang ilang lisensya aron matudloan sila og laing leksyon.

Sa laktud nga pagkasulti, kun magtinarong lang ang mga drayber dili gayud sila madakpan. Pananglit ako, bisan og usa ko sa mga law enforcer sa LTO, dili ko mag-drive og motor nga walay helmet apil na ang tawo nga mosakay nako. Kun mag-drive man ko sa karaan ko nga kotse, pulos g’yud maniga ang akong suga panahon sa gabii. Kini maoy rason nga wala g’yud ko madakpi nga nag-drive.

* * *

Dakung tubagonon ni City Treasurer Tessie Camarillo kun nganong mipirma siya sa P11.8 milyones nga budget ni Mayor Michael Rama nga unta nasayud man siya lisud kini kab-oton.

Dili kita makabasul ni Mayor Rama kun moingon siya nga wala siya makagusto sa pamahayag ni Camarillo. Apan unsa man kining pamahayag ni Camarillo ngadto ni Vice Mayor Joy Augustus Young nga na-pressure ra kuno siya mao nga iyang gipirmahan ang budget?

Na hala, tan-awon nato kay mora’g siya ra ba ang modepensa sa gisugyot nga budget sa mayor atul sa budget hearing diin tabangan siya’g kuti-kuti og pangutana sa mga konsehal.