Husto na uy!

Leksyon sa atong mga opisyal sa kagamhanan nga likayi g’yud ninyo nga abusohan ninyo ang kwarta nga dili inyo.

Ang gipasabot nako mao ang gihimo sa atong mga konsehal sa dakbayan nga miuyon sa sugyot ni Konsehal Jose Daluz III nga pagastohon ang dakbayan og P360,000 sa pagsulod nila og kontrata sa Holiday Spa.

Grabe kaayo uy. Tiaw mo nga ang kwarta sa dakbayan maoy ilang gamiton sa pagbayad sa pagpahimulos nila sa kagamitan sa Holiday Spa?

Unya, nahibaw-an pa gayud sa DYLA nga gipaburot kon overprice pa g’yud diay ang kantidad. Pagkasalawayon g’yud tawon. Basi sa pakisusi sa DYLA nahibaw-an nga ang bayad sa mata’g tuig P12,000 ra g’yud unta ug dili P18,000. Ang kontrata nga gisudlan sa dakbayan sa Sugbo pinaagi ni Mayor Michael Rama ug sa operations manager sa maong Spa tag P18,000 ang buwan sa matag opisyal. Unya 20 ka opisyal ang makapahimulos sa P360,000 nga kontrata sa usa ka tuig.

Kaniadtong pipila ka buwan ang nakalabay, si Konsehal Noel Wenceslao misugyot usab nga mamalit silang mga konsehal ug vice mayor og fireman’s vest aron kuno gamiton kun moresponde sila og mga sunog ug uban pang katalagman.

Maayo na lang kay si Konsehal Wenceslao mibakwi niadtong maong lakang human nga gisaway sa katawhan ang maong sugyot. Saludo ko nimo Konsehal Wenceslao. Apan si Konsehal Daluz miinsister g’yud ug gigamit ang iyang pagka-abogado.

Ang iyang argumento mao nga katungod kuno sa dakbayan nga mogasto alang sa panglawas sa iyang mga opisyal, sama ra kuno nga mogasto ang dakbayan sa mga sports activities sa ubang kawani.

Pastilan, lahi ra kana uy. Unya, nganong overprice man ang kantidad sa kontrata nga gipirmahan sa mayor ug sa operations manager sa maong Spa? Kini maoy lisud tubagon gawas lang kun gamitan og baliko nga argumento. Maayo kay mihukom ang Ombudsman nga imbistigahon nila kining maong isyu. Kamong mga opisyal sa kagamhanan, pagbantay kamo nga dili makaabuso sa kwarta nga dili inyo.

Wala pa ba kamo makontinto nga nagsakay-sakay kamo sa sakyanan sa kagamhanan ug ang gasolina ug bayad sa gasto kun madaut giabaga usab sa gobiyerno?

* * *

Nakadawat usab ko og electronics mail nga nagbutyag nga usa ka opisyal sa City Hall pastilan mao g’yud kuno ang mangita sa kabanayan niadtong mga tawo nga midonar og yuta sa nanglabay’ng katuigan alang sa karsada. Ang modus kuno mao nga ang maong opisyal mao g’yud ang maningkamot aron mapabayran sa dakbayan ang yuta nga gidonar sa iyang orihinal nga tag-iya alang sa karsada.

Daghan man kini kaayo kay ang mga tawo gud kaniadto malipay man nga modonar sa ilang katigayonan alang sa public purpose. Dili man sama karon nga daghan kaayong mga hakog sa ilang katigayonan.

Ang akong informer miingon nga dili siya makatoo nga ang maong opisyal sa City Hall nga naningkamot nga mabayran ang maong yuta nga wala sa dugay’ng panahon gigamit nga karsada, wala makadawat og dakung bahin sa halin.

Kinsa kaha kining maong opisyal no? Duna koy mga gipangutana nga mga higala nakong konsehal miingon man nga “ambut.” Si Mayor Michael Rama nga 18 ka tuig diha sa konseho nagpaka-inosente usab.

Nagpatoo nga wala siya makabantay. Mas maayo pa si kanhi City Treasurer Ofelia Oliva kay nakabantay usab diay. Bitaw, ayaw pagtoo nga dili masayran kun duna mo’y tinonto.