Pagpili sa paglingiw

Nakapuyo ko sud sa daghang katuigan sa Pier Uno, Pasil ug Kamagayan sa Dakbayan sa Sugbo nga pulos nagpunsisok ang mga molupyo. Tungod sa kasikit sa kabalayan, way sekreto nga matago og dugay gikan sa mga silingan. Maong hapit tanan nahibawo kinsay magtiayon nga nag-away, kinsay bana nga hingulata og asawa, kinsay bana nga daog sa asawa, kinsay adik, kinsay durugista, kinsay palahubog ug kinsay kabit ni kinsa.

Kay naghibaw-anay na man, wa nay magtagad pagtago sa ilang away. Way pugnganay sa kalanog sa mga sigaak ug balikas. Kasagaran sa karambola sa magtiayon ug ubang sakop sa pamilya niawas sa dan. Gawasnong niabiba ang mga silingan. Apan nagbantay nga way mahinaykan.

* * *

Taliwa sa kaalingugngog nga maoy namat-an sa kadlawon ug nakatulgan sa tungang gabii, di nako makalimtan ang kabantok sa pagdapat sa mga kumo ngadto sa apapangig ug ubang bahin sa lawas, kasagaran gikan sa bana ngadto sa asawa, nga pasiunhan og saba nga lalis ug sundan sa pinugngan nga danguyngoy sa mga biktima.

Inigka hayag na, mabantang nako ang panagway sa mga asawa nga namurot, namuwa ug nanglagom. Balik sa ilang naandan nga mga gimbuhaton, gustong mahikalimot sa karambola sa niaging gabii. Apan determinado sang nangandam sa dakong kahigayonan nga makulatahan na sab sa sunod nga pagkahubog sa bana o sa sunod nga lalis nilang magtiayon.

* * *

Kausa, nalabyan nako among silingang magtiayon sa Pasil nga naglayog sa dan. Ang asawa nisuway pagpangawras apan napiog sa mas dakong braso sa bana. Nga, bisan nabantang namong tanan, wa managana pagmakmak sa dagway sa asawa. Nilingiw ko apan nabati gihapon ang sunudsunod nga mga kumo nga nakapahilom sa biktima.

Way bisan usa nga nanginlabot sa lalis, ni nipugong sa pagsugod na sa kulata. Apan dihang nipunit nang bana og bangkito aron ihapos na unta sa nalup-og nang asawa, ang labing dako’g lawas namong silingan nibaraw ug dihang wa paminawa, nihapos sa mas dako niyang kumo nga nakapahay-ad sa mora’g giyawaan nang bana.

* * *

Karon nia na ko magpuyo sa usa ka subdivision.  Nga mas daghang bakanteng luna kay sa kabalayan. Pulos may koral, ang pipila gani mas habog pa kay sa ilang atop. Wa na koy kasayuran unsay nahitabo sa sud sa ubang mga pinuy-anan. Ug wa nay bisan usang nagsusi.

Way nakahibawo unsay nisantop sa hunahuna ni Emmanuel Ponce nga nakaaghat niya pagpatay sa iyang asawa, mga anak ug katabang. Apan mahimong may mga timaan na nga wa lang tagda—ambot tungod ba sa kahadlok nga mahibaw-an sa kadaghanan o sa pagpili sa mga silingan sa paglingiw. Di kakabos sa materyal nga kabtangan ang hinungdan sa trahedya. Kun dili kakabos sa pagpakabana. Maong kabahin nato namatay uban sa mga biktima.

* * *

Email: [email protected].