EDITORYAL - 2012 kuno matapos ang kalibotan?

May pipila ka mga tigbasa og Biblia nga mihatag kahulogan sa mga nahasulat nga sambingay sa maong basahon kalabot sa panahon sa kataposan sa kalibotan.

Ilang gisukod ang gintang sa panahon gikan sa panahon ni Adan ug Eva hangtod sa pagsugod sa panahon sa mga propeta ug gikan sa panahon sa mga propeta hangtod sa pagkatawo ni Kristo.

Naamgohan nila nga gagmay ra og deperensya ang gidugayon sa mga tuig nga nagbahin gitawag nga matag buko sa panahon, gikan sa panahon sa mga ginikanan kutob sa panahon sa mga propeta ug gikan sa panahon sa mga propeta kutob sa panahon sa pagkatawo ni Kristo, nga maoy ilang gibasehan sa gidugayon gikan sa pagkatawo ni Kristo hangtod sa adlaw sa iyang pagbalik nganhi sa yuta nga mao ang kataposan sa kalibotan.

Unya may pipila nga mihatag og konklusyon nga sa 2012 gyud ang pagbalik ni Kristo kun basehan ang mga gintang sa panahon   nga naglangkob sa gidugayon sa matag buko sa panahong gipatik sa Biblia.

Apan ang tinuod bisan bali-balihon pa og basa ang Biblia, di ka makakita og setas nga nagtug-an unsa gyung tuiga, buwana ug adlawa moabot sa Kristo.

Kay ang nakasulat mao nga ang pagbalik ni   Kristo sama sa usa ka kawatan nga bugtong ang Dios ra maoy nasayud kun kanus-a kini mahitabo.

Si Kristo mismo   sa Iyang kaugalingon igo lang magpaabot ug motuman sa mandar sa Amahan nga maoy magbuot kanus-a siya pabalika nganhi sa yuta.

Apan ang tinuod mas maayo nalang ang tawo nga nasayud nga mobalik si Kristo kay usahay makahinuktok    kini unsay iyang buhaton aron maluwas siya pag-abot sa maong adlaw.

Kay ang pagbalik ni Kristo sama ra sa panahon ni Noe nga way mituo nga inighuman sa iyang arka matinuod ang iya nang gipahibawo nga may lunop nga moabot.

Sa dihang miabot ang lunop, naimpas ang tanan ug mas maayo pa ang mga mananap nga misugot sa awhag ni Noe kay naluwas sa maong higayon. Di ba?