Ang karnero ug kanding sa atong kinabuhi

Sa akong bahin, nahimugso ako sa tuig sa karnero ug ang akong Zodiac Sign mao ang Kanding/Capricorn. Ang karnero simbolo sa kaayo ug gani kining mananapa ang gamiton man nga halad sinunog sa altar alang kang Yahweh. Ang kanding sa laing bahin, gamiton aron sa ulo niya itapion ang mga kamot sa pari sa Judaismo ug buhian siya ngadto sa kamingawan dinala ang mga sala sa katawhan.

Ang karnero mohilom samtang ang kanding mobahihi taman sa   ginhawa. Ang maong mga hayop representante sa mga panghitabo mismo sa akong kaugalingon. Ang padayong panagsungi sa maayo ug sa dautan ngari kanako. Matag usa dunay pahat sa pagkamaayo ug sa pagkadautan. Nga resultado usab sa atong kaugalingong kasaysayan ug nimugna sa atong mental ug behavioral schema. Kita ang gipahinumdoman ning mosunod aron makab-ot nato ang kaayohan.

A. Ang pag-angkon sa mga panghitabo sa atong kinabuhi ug dili ang pagsemento nila sa kalimot.

B. Ang pag-abli sa imong pagbati aron kini makahungaw sa mas produktibo ug hamtong nga paagi.

C. Ang pag-alinggat sa dagan sa imong panghunahuna. Unsay nakapahinumdom nimo niini?

D. Susiha ang naandang dagan sa imong mga buhat gumikan sa maong mental ug behavioral schema.

Ang karnero ug kanding bisan managlahi ang managsamang nagpahinumdom kanato sa kaanindot sa sibsibanan sa kinabuhi. Samtang dunay masibsib anaa ang kinabuhi.