Sayop nga pagtuo Ni ROMEO T. LIMPANGOG

Ang pamarog ug ang pamayhon sa usa ka tawo maoy sagad atong basehan sa kahimtang ug kinaiya nga maoy hinungdan nga bisan dili pa nato sila hingpit nga gikaila atong ihatag ang pagsalig ngadto kanila.

Dakong kalainan atong pagtagad ngadto sa mga tawo nga dili maayo ang pamarog ug pamayhon nga dili kita makahatag sa atong pagsalig ug gani katahapan pa nato sila nga mga kawatan o tulisan.

Kini ang kasinatian sa usa ka babaye nga biktima   sa pagpanguot sa iyang pitaka sa sulod sa usa ka de kalidad nga kan-anan sa uptown area.

Sa pagsulod sa maong babaye sa maong kan-anan maoy iyang giuna sa pag-aninaw ang lamesa nga iyang lingkoran sa pagsiguro sa iyang kaugalingon sa mga tawo nga iyang ikatupad og lingkod.

Human sa iyang pag-order og pagkaon iyang gianinaw ang palibot ug iyang nakita ang usa ka lalaki nga nag-inusara nga nagkaon sa lamesa.

Ambongan ang maong lalaki ug desente ang pamiste ug napuno sa nagsinawsinaw nga mga alahas ang mga tudlo, samtang sa pikas hahig nga lamesa maoy iyang nakita ang laing lalaki nga nag-inusara usab nga nagkaon.

May pagkalaksot ang panagway sa maong lalaki ug dili usab desente ang gisul-ob nga pameste ug wala kini relo ug labaw na nga walay alahas nga nagsinawsinaw ang mga tudlo niini.

Gipili sa maong babaye ang paglingkod sa lamesa nga nahimutang sa lamesa nga gikan-an sa desente ug ambongan nga lalaki sanglit dako man ang iyang pagtuo nga luwas iyang mga butang nga ipahimutang haduol niini.

Gipahiluna sa maong babaye iyang giorder nga pagkaon ug gitongtong sa lamesa ang gisambilay niyang shoulder bag nga gisudlan sa dakong kantidad nga salapi.

Walay luna sa kabalaka ug kahadlok ang maong babaye sa iyang nahimutangan sanglit gikatupad man niya sa paglingkod ang ambogan ug desente nga lalaki nga sa iyang pagtuo dako kini og katungdanan sa kompaniya nga gitrabahoan.

Milabay ang pipila ka gutlo sa iyang pagkaon ang maong babaye daw nakahunahuna sa pag-order og mainom nga iyang nalimtan sa pag-order maoy hinungdan sa iyang pagbarog sa pag-order niini.

Sa pagbalik sa maong babaye sa iyang gilingkoran nga lamesa dako niyang kahingangha kay nahanaw na man iyang shoulder sa iyang gibutangan ug nagkabuang na kini sa pagpangita sa iyang palibot sanglit nahanaw man usab kadtong tawo nga gikatupad niya og lamesa.

Naglingilingi ang maong babaye nga puno sa kahingawa ug maoy misugat sa iyang panan-aw kadtong tawo nga laksot ug panagway nga nagbitbit sa iyang bag kuyog sa lalaki nga gikatupad niya og lingkod nga giposasan ang mga kamot.

“Maam,” sa laksot pa nga lalaki nga misampit kaniya ug nagpailang opisyal sa kapolisan.“Dia ang imong shoulder bag ug nakita kong gibitbit na niining maong lalaki maoy hinungdan nga akong gidakop. Busa, kuyog kanako sa presinto alang sa pag-blotter sa nahitabo kanimo.”