Nganong hadlok man si Noynoy sa ChaCha?

Kadaghan na ta mag-ili-ilis og Presidente ug ubang mga elective officials sa nasud.

Adunay mga bag-ong Senador ug sakop sa Lower House; mga bag-ong Cabinet secrtaries ug undersecretaries, mga bag-ong heneral sa kasundalohan ug kapolisan; mga bag-ong gobernador, mayor, konsehales ug kapitan sa barangay.

Hinoon, gumikan sa kahakog sa gahom ug kabuang sa mga pumipili, atong padag-on sa eleksyon ang mga asawa o bana, igsoon, ig-agaw, o mga anak sa mga last termers. Mao kini ang matang sa demokrasya sa atong nasud. Ug proud kaayo ta ini.

Karon, unsa man ang atong nasud? Naghitak ang corruption, nagkadaghan ang mga pobre ug ang gigutom, ug minilyon na ang mga walay trabaho. Kriminalidad inadlaw na. Public service napasagdan; tubig ug kuryente mahal na kaayo; kompaniya sa gasolina ug gasul nagpatuyang na lang. Traffic di na matabang.

Kini ug daghan pang problema ang naghulga sa nasud. Unsa may solusyon? Waay klaro. Asa man ta paingon? Waay klarong direksiyon. Mag-unsa na man lang ta ini? Huwat lang! Huwat sa unsa?

Tapus nato palagputa si Marcos, daku ang atong paglaom nga at last, mouswag na gyud ang atong nasud. Mawagtang na gyud ang corruption, magbinuotan na gyud ang taga-gobyerno, kalinisan na gyud ang eleksiyon, ug mahayahay na ang kabutang sa mga Pilipino.

Apan, unsay nahitabo? Ang tanang gihimo ni Marcos, dautan ug maayo, atong gi-abolish, apan waa tay gipuli nga mas maayo. Ang nahitabo, nagkagrabe ang corruption , ug misamot ka-ut-ot ang atong nasud , naglumba ang gipanggutom nga Pinoy paglayas gawas sa nasud, aron adto sila didto mabuhi.

Ngano man ni? Tungod ba sa sistima? O tungod sa mga tawo mismo? Sa ako nang giingon, sige na tag ilis-ilis og mga lider gikan sa Presidente hangtud na sa pagka-konsehal sa barangay … apan, waa man kitay nakitang alibiyo sa atong kahimtang as a nation.

Alang sa uban, lakip na ko, kinahanglan usbon ang sistima sa panggobiyerno, pinaagi sa pag-usab sa Cory Constitution. Mao ba ni ang nahadlokan ni Noynoy dili siya buot mousab sa Constitution sa iyang inahan? Giusab nato ang kang Marcos nga Constitution, apan aduna konoy nakita nga mga provision sa kang Marcos Constitution nga mas maayo pa kay sa Cory Constitution.

Apan, daghan usab ang supak sa ChaCha, tungod kay among others, hadlok sila nga ma-waa ang pork barrel. Ug dili na manghawod ang Imperial Manila. Ug kun maghisgot tag ChaCha, dili parliamentarian ang solusyon, kundili ang Federal Presidential system, sama sa America. Nganong hadlok man si Noynoy ini?