Dugang flyovers?

Alang nako, bisag di ko engineer, di ko traffic management expert, di ko environmentalist ug samot nga di mayor o congressman, apan, akong tan-aw kining mga skywalk ug mga flyovers sa atong dakbayan, morag wa himoi o extensive kaayo nga study, una panukora.

Gawas niadtong panahon ni Gov. Lito Osmeña nga duha ka flyovers , ang uban, way kapuslanan ug way gamit. Examples: Kanang anaa sa Capitol parish, ambut pila ray mosaka diha sulod sa usa ka adlaw. Unya, inigpanggula gikan sa Santos nga Misa, waa gyuy bisag usa ka churchgoer nga maghaguhago og saka sa skywalk.

Sa ato pa, usik-usik sa kwarta sa mga magbubuhis. Unya, kanang anaa sa Mabolo atbang sa simbahan ug tunghaan, tapus sa Misa ug dismissal sa kabataan, ambut pila ray mogamit sa flyover? Sa Jones (Don Sergio Osmeña Ave.) ,pila ra may mosaka sa mga flyower atbang sa SSS kay adto na molabang sa duol nga eskina.

Ingonman, ang sa Robinsons dapit, gumikan sa katapulan natong mga Pinoy, mo-risk gyud sila paglabang sa dalan, bisag busy ang traffic, kay sa mosaka pa sila sa skywalk. Sa Mandaue, sa may UC, padulong sa Mactan bridge, alang unta sa safety sa mga estudyante, nahulog nga walay gamit ang skywalk tungod kay tapulan na ang mga estudyante pagsaka-kanaug niini.

Kini, ug uban pa tingaling mga skywalk ug flyovers nga na-walay kapuslanan, kay gawas sa pagkatapulan sa mga pedestrian, wala kini makasulbad sa problema sa trapiko tungod kay maghuot man ang mga sakyanan inig-converge niini inigsaka ug inigkanaug sa taytayan.

Busa, kun kinahanglan man ang dugang flyovers, kinahanglan tun-an kinig maayo, aron dili kadugangan ang nausik nga kwarta.

Hinoon, alang sa long range nga kagamitan, daku og gamit ang gilaraw ni Rep. Tomas Osmeña pagbutang og flyover sa SRP.

* * *

Kahigayonan sa mga engineer nga nanguli nganhi sa nasud. Giingon nga adunay mga 25,000 ka mga Filipino engineers ang na-displaced gumikan sa kagubot sa Middle East, particularly sa Libya. Ug mga 22 mil niini ang napugos pag-uli nganhi sa nasud.

Apan, adunay maayong kahigayonan alang kanila. Ang AG&P (Atlantic Gulf & Pacific Co.) sa Bauan, Batangas, giingon nga nagkinahanglan og kapin sa 4,000 ka mga engineer nga may kasinatian sa oil refining facilities, kini tapus sa pagpakigsabut ni Noynoy ug kadagkuan sa AG&P di pa dugay.

Mipasalig ang AG&P nga samtang dili sila maka-compete sa sweldo nga gihatag sa Libya, matud pa, competitive ang ilang mga compensation. Ug ang kompaniya, nagtanyag og housing alang sa mga empleyado ang AG&P mi-provide og housing ug pagkaon ngadto sa mga empleyado niini, matud ni Sec. Ramon Carandang, sa Presidential Communications Development & Strategic Planning.

Mas arang-arang na lang kini nga mga incentives kay sa mobalik pa sa Libya. Sa nasayran, daghang mga highly skilled Filipino engineers ang nagtrabaho sa mga oil rigs ug refineries didto sa Libya. Anhi lang ta sa ato gud !