Asa ka na karon?

Usa nako ka higala ang mi-text kanako: “Asa ka na karon?” ako ni-reply: “Talavera House of Prayer” kay lagi annual retreat uban ni Arsobispo Jose S. Palma, DD. Apan ang pangutana nga dunay kalabutan sa “whereness” ang mahimo usab nga pangutana sa usa ka kahimtang o estado sa usa ka tawo.

Asa ka na sa imong panaw ingon nga tawo? Nagmalipayon ka ba? Kontento ka ba? Tataw ba ang imong padulngan o hanap pa ba kini tungod kay daghan kaayong mga detours sa imong kinabuhi. Mga biglang liko nga bisan pa man tuod exciting apan sa kaulahian sakit ug makalibog. Kay imbis usa lamang ka direksiyon ang imong padulngan nahimo naman hinuon kining magsanga og mga dalan nga walay tinong padulngan.

Mga kabalaka nga dunay kalambigitan sa kaugalingong kahadlok, mga gitinguha (desires) ug ang pangutana: “Ginoo, unsa may imong mahimo alang nako? O unsay imong buot ipabuhat nako?” Mga pangutana nga bugtong ang panahon ingon man ang kahilom maoy makatabang diha sa pagpatidlom niini. Sa laktod, pangandoy gyud sa matag tawo ang kahulogan sa iyang kinabuhi ingon man ang rason kun nganong kinahanglan niyang magpakabuhi.

Kaayo gyung isiyagit sa matag higayon nga mag jogging kami sa akong mga kaubanan aron mahimong haw-ang ang kalandrakas nga hunahuna ug kasingkasing. Sa matag tulo sa singot ug sa matag utnga sa gininhawa uban ang kakutas akong nakita ang mensahe. Ug kini ang paghaw-ang sa hunahuna ug kasingkasing aron makita ang tinud-anay nga kaanyag sa kinabuhing tawo nga gihimong pari.

Husto gyud si Fr. John Rona nga bugtong niyang tinguha nga unta siya makapaminaw gayud kang Jesus nga mosulti ngadto kaniya. Ang libro nga emotional alchemy nga sinulat ni Tara Bennett Goleman ang nisugyot sa space of clarity diha sa atong hunahuna aron mas molutaw ang kaanyag nga anaa na nimo mismo...asa na kaha ko karon? Padayon pa sa pagpamalandong.