Palpak sa communications group ni PNoy

Human maputos sa mga pagsaway tungod sa wala niya pagpakita didto sa mga dapit nga gibaha sa Northern ug Central Luzon nunot sa nagsunod nga pag-igo sa bagyong Pedring ug Quiel, nipakita na sa miaging adlaw si Presidente Benigno Aquino.

Apan bisan sa pagbisita na ni PNOY didto sa mga nabahaan nga dapit nagkabuang lang gihapon og depensa ang mga tigpamaba sa Malacañang sa kalangan sa pagduaw sa presidente.

Dili man gud malikayan nga madudahan ang sinseridad niini sa iyang pagbisita.

Kini tungod kay mosugot ug sa dili ang Malacañang mahulog gyud nga reaksiyon nalang ang gibuhat sa presidente sa daghang mga pagsaway.

Si Sec. Ricky Carandang mipasabot kagahapon nga ang nakalangan sa pagbisita ni PNOY mao ang nagdanga-danga unta nga bagyo nga si Ramon.

Apan natunaw ug wala mahinayon si Ramon. Alang nako taphaw ni ang maong rason.

Nganong dili naman lang angkunon sa Malacañang nga wa gyud untay plano si PNOY nga moduaw sa mga nabahaan?

Si Aquino na mismo ang mitug-an nga lahi ang iyang management style tungod kay iyang gihulagway nga ang pagbisita sa calamity area usa lang ka foto ops.

Samtang tinuod wala gyud kinahanglana nga personal si Aquino nga motunol sa mga pinutos nga relief goods sa mga biktima, apan lahi man gud ang kinaiya nato nga mga Pilipino.

Dili man gud masabtan sa yano nga lungsoranon nga makabalda lang sa pag-apod apod sa mga hinabang ang pagduaw sa presidente tungod kay kinahanglan man sab siya nga atimanon.

Gawas pa problema sab ni sa siguridad. Mao man gu'y pagtuo sa katawhan nga kun ang usa ka lider mopakita nila panahon sa katalagman usa siya ka maayong lider.

Ato man gud nga gikalimtan nga dili sa iyang presensiya masukod ang abilidad sa usa ka maayo nga presidente kun dili sa kaepektibo sa pagresponde sa iyang gobyerno ug sa paspas sa pagtubag sa nanginahanglan og tabang.

Kini maoy trabaho unta sa mga tigpamaba sa Malacañang, ang pagpasabot sa katawhan niini ug dili kay patuohon pa gyud ang publiko nga kinasingkasing nga gusto nga moubog sa tubig baha ang presidente.

* * *

[email protected]