Ang pagpalarot sa lamppost

Wa kaayo’y nakaako sa pagpatuy-aw sa pagsupak sa laraw ni Mayor Mike Rama nga habason ug laroton ang tag P250 mil matag usa nga decorative lamppost nga gipanarok sa kadaplinan sa kadalanan sa mga dakbayan sa Sugbo, Mandaue ug Lapulapu atol sa ASEAN summit niadtong 2006.

Kini tungod kay nahug lang og way nada ang pagbabag niini, kay wa man usay kapuslanan ang maong mga lamppost kay sa pagkakaron ang gipaabot nga   kahayag gikan niini panahon sa kagabhion nawagtang na    human kiriwa sa mga kawatan ang mga linya sa kuryente niini.

Gani mismo ang uban sa 360 ka mga poste nga gigastohan sa gobyerno og P45 milyones nawagtang na usab kay gipatimbang sa mga kawatan.

Sa ka way maayong pamarug sa maong mga poste ug bisan ang mga materyales niini, daan nang gihimadlan nga nag-usik lang sa gasto ang gobyerno sa maong mga suga.

Gikan sa giingong tag- P10 mil ra ang presyo sa matag usa sa maong poste, gihimo na kining P250 mil dihang gipanarok na, busa gikagubtan ang maong presyo sa katahap nga daghang nakabulsa og dagkong kantidad sa ginansya niini.

Sa laing bahin kun may mosupak nga laroton ang maong mga poste, sa unsa pa kahang hinungdan ug katarungan, aron lang ipaibog sa mga kawatan?

Apan kun habason kini ug hiposan sa usa ka lugar nga dili mahilabtan sa mga kawatan, mas maayo pang taya maoy mokaon niini kay sa magpabilin diha sa kadalanan nga nangimbitar lang sa mga kiriwan aron sila labing mahimong dautan.

Bahin sa mga opisyal sa gobyerno nga nakapahimulos sa dagkong ginansya sa maong mga poste, aw pasagdi sila    nga nakakuwarta ug nakapakaon sa ilang pamilya sa maong mga ginansya.

Kay kun maayo sila og kahimtang sa pagpuyo ug nakaako pa sa pagpahimulos sa kuwarta sa mga magbubuhis, ikatandi ra sila   sa mga uyamot kaayong tawo nga way laing gihimong panginabuhi alang sa ilang pamilya gawas sa   ilang mga kinawat. Di ba?