Ang di makitawhanong PRC

Bisan sa adlaw sa pasulit sa mga gustong magtudlo padayong gilutos ug gidaugdaug sa mga hingtungdang buhatan sa gobyerno ang mga gradwado sa Mandaue City College nga gidumala ni Dr. Paulos Cañete. Ang 23 ka mga examinees sa nahisgutang tunghaan ang hapit wala makakuha sa pasulit tungod kay wala sila apili sa pagkopya og test papers.

Kaniadtong adlaw nga Sabado sa akong tulomanon nga Morning na Cebu nga inyong mabati matag alas 4:30 sa kaadlawon hangtod na sa alas 6:00 sa buntag akong nahinabi si Dr. Paulos Cañete. Dinhi iyang gipaabot ang dako niyang kalipay human mandoi niadtong Biyernes ni maghuhukom Soliver Peras ang Professional Regulation Commission o PRC ug ang Commission on Higher Education o CHED sa pagtugot sa mga gradwado sa Mandaue City College nga iyang gidumala nga makakuha sa Teachers Board Examination niadtong miaging Domingo.

Ang kamandoan ni maghuhukom Soliver Peras gipatuman dayon kini nianang adlawa apan nagdumili sa pagdawat ang mga taga PRC ug CHED. Hinoon sa modawat man sila o dili sa kamandoan sa hukom pugos gayod kini nilang tumanon. Apan kaganihang buntag ako na lamang nasayran nga hapit gayod wala makakuha sa pasulit ang mga examinees nga gikan sa tunghaan nga gidumala ni Dr. Cañete. Ang rason sa taga PRC wala maapili og kopya sa mga test questionaire ang mga nahisgutang examinees busa ila na lamang kining gipapaabot niadtong mga questionaire nga iya sa wala molahos sa pagkuha sa pasulit. Pagka alas 9:00 sa buntag ang tanang examinees sa Mandaue City College nakakuha ra gayod sa pasulit. Salamat na lang sa Ginoo nga miabot usab og 23 ka mga examinees gikan sa nagkalain-laing tunghaan ang wala modayon sa pagkuha sa pasulit. Porbida no?

Klaro ug tataw nga gilisud-lisod gayod sa taga PRC ang mga examinees sa tunghaan nga gidumala ni Dr. Paulos Cañete. Ang giingong wala maapili og kopya sa test questionaire ang mga examinees tinonto ug binuang sa mga taga PRC. Kay ngano moabot ba ugod og usa ka adlaw ang pagpakopya sa questionaire sa 23 ka mga examinees kun gusto pa gyod sa taga PRC nga dili lisud-lisuron ang mga examinees ni Dr. Cañete?

Ang PRC dili makarason sa kakulangon sa oras agi og pagpanalipod sa gihimo nilang binuang. Ang pangulo sa PRC usa ka abogado ug siya nasayod mismo nga ang test questionaire sa BAR examination ana nang adlawa kopyahon aron malikayan ang leakage busa kun nahimo sa taga Korte Suprema ang pagpakopya og test questionaire nga lima ngadto na sa unom ka libo ka mga examinees ang PRC pa kaha nga 23 lang ang ilang himoanan?

Gituyo gayod sa PRC ang paglangay og hatag sa questionaire sa examinees ni Dr. Paulos Cañete. Motoo mo nga wala apili og kopya sa PRC ang mga examinees sa Mandaue City College? Kun wala pa maapili og kopya ang mga examinees nganong pagka alas 9:00 sa buntag nahatagan naman sila og test papers? Pagkasulagma ba upod nga miabot gyod upod og 23 ka mga examinees sa laing mga tunghaan ang wala mopadayon sa pagkuha sa pasulit?

Sa ilang gihimo nagpakita lamang ang PRC nga dili sila makitawhanon. Wala nila tan-awa nga baldado nang daan ang preparasyon sa mga examinees tungod sa ilang kahimtang pero ina kay tabangan ila hinoon kining gidugangan.