Sa diha nga ang usa ka bahandianon miduol kang Ginoong Jesus ug nangutana kun unsa pa ang nakakulang kaniya aron makabaton og kinabuhi nga dayon si Ginoong Jesus mitubag “ibaligya ang tanan mong katigayonan ug mosunod ka kanako.,”
Gumikan sa maong tubag ni Jesus, ang dato nasubo ug mitalikod. Tataw ug klaro kaayo nga ang dato maglisod gayod sa pagtuman sa gisugo kaniya sa atong Magbubuhat. Kana tungod kay maglisod siya sa pagtalikod sa bahandi nga iyang gihagoan sa pagtigom sulod sa daghang mga katuigan aron nga modaghan.
Dinhi ning puntoha gipapili ni Jesus ang dato kun asa siya. Ari ba sa mga butang langitnon o espirituhanon o mga butang nga kalibotanon o tawhanon. O ari ba siya sa kinabuhing dayon o kinabuhi nga malaglag. Sa diha nga ang dato nahasubo ug mitalikod, tataw ug klaro kaayo nga ari siya sa kinabuhing may kalaglagan.
Gumikan sa hukom sa dato, si Ginoong Jesus misulti nga mas lisod kuno sa usa ka dato ang pagsulod sa gingharian sa langit kay sa usa ka kamelyo sa pagsulod sa usa ka gamay’ng lungag sa dagom.
Tataw ug klaro kaayo nga sa pagtalikod sa dato, ang iyang gipalabi mao ang kalibotanong mga butang. Nawili pa siya sa mga butang nga ikatanyag kaniya sa kalibotan. Sama sa babaye, alak, pagkaon ug kaibog sa pagsud-ong sa mga matahom nga talan-awon sa kalibotan.
Sa diha nga mitalikod ang dato, tataw ug klaro kaayo nga kulang ang iyang pagsalig ngadto ni Ginoong Jesus nga makahatag pa siya og mas labaw pa nga kalipay kay sa kalibotan. Kay diha ugod sa galamhan sa dato anaa ang garbo, kasilag, pagdumot, pagkamapahitas-on, pagkahambugero ug uban pa.