"Road konsumisyon"
Walay bisan usa sa akong gipangutana ang nalipay sa pagsirado sa dalan Colon ug sa mga silingang kadalanan niini sa down town area niadtong Sabado tungod sa gipasiugdahang "Road Revolution" sa mga nagpakaaron ingnong mga environmentalist.
Ang tanan nakong gipangutana nagbagulbol ug wala makasabot sa maong kalihukan.
Labihan man gud kadaghan sa mga tawo nga nahasol sa wa gyuy pulos nga pagsirado sa kadalanan.
Nakaingon ko nga walay pulos kay wala man mokunhod ang gidaghanon sa mga sakyanan nga nanagan nga makapaminus unta sa aso nga gibuga.
Hinuon nagmugna lang kini og makalilisang nga kahuot sa trapiko ug konsumisyon sa mga tawo.
Daghan ang nangasaag nga mga motorista tungod kay awahi kaayo ang pahibawo sa rerouting.
Mga pasahero nagkabuang sab og asa dapita mag-atang og sakyanan hinungdan nga daghan ang nanga-late sa trabaho.
Ang mas labaw'ng nahasol ug nakonsumi mao intawon ang mga kaslonon nga nipahimulos sa gipasiugdahan nga mass wedding sa dakbayan.
Tiaw mo bay nagbaklay intawon ang uban nila nga nagsul-ob na og trahe de buda.
Nagkadusingot intawon ang uban nga miatubang sa altar didto sa Cathedral. Samtang ingon niini ang kahasol ug konsumisyon nga namugna sa " Road Revolution" ngadto sa mga motorista ug sa mga commuters, diin man ang mga tigpasiugda?
Inay nga himuon ang ilang gara-gara aron lang gyud makakuha og atensiyon sa media, ang maayo tingaling buhaton sa grupo nila ni Atty. Antonio Oposa mao ang pagpahunong sa nagpadayon nga quarry sa kabukiran.
Nganong dili man sila mananum og kahoy ug ipangkiha ang mga developers ug ang mga tunto nga kakunsabo niini nga mga opisyal sa gobyerno nga miguba sa atong kabukiran ug kinaiyahan?
Mas duna ni kapuslanan kay sa pagpatak-up sa karsada. Makapugong ba gud sa paglunop ug baha ang pagtak-op sa karsada?
Utro pud nga hanggaw ang mga opisyal sa dakbayan sa Sugbo nga nagpagamit niining mga tigpakaaron ingnon aron makapangayo og pundo gikan sa ilang mga benefactors. Sa kalapad sa epekto ug kahasol sa pagsirado sa kadalanan angayan unta nga nangunsulta una sa publiko ang dakbayan sa wala pa nila itugot ang maong kalihukan.
Apan ang gihimo sa atong mga opisyal nagbuot-buot sa way pagsanghid sa katawhan nga maoy labaw'ng nahasol sa ilang kayabag.
* * *
- Latest
- Trending
