Ayoha'g himo ha!

Kusganong gisupak sa kadagkoan sa media ang gisugyot nga “Provincial Anti-Tabloid Ordinance” kay nabalaka sila nga abusohan unya kini sa mga opisyal sa kagamhanan nga nasuko kay nabalita sa maong mga mantalaan ang illegal nilang kalihukan.

Dili ba posible man? Husto ang baruganan sa Integrated Bar of the Philippines (IBP) Cebu City Chapter nga kun patuyangan nimo, posible nga kaming mga tagdumala og tabloid maoy masakripisyo.

Dili usab tukma nga hinganlan ang ordinansa og anti-tabloid ordinance kay nagpasabot kini nga illegal diay ang tabloid? Kining mga pamantalaan nga sama sa Banat News ang gidak-on mao kini ang ginganlan og tabloid.

Unya kun tugotan nimo ang mga opisyal sa kalungsuran nga mosakmit sa mga pamantalaan basi lang sa ilang pagtoo nga nakalapas kini sa balaud, ang epekto niini mao nga mahimong gamiton kini sa pagpanimalos.

Pananglit karong adlawa nagbansiwag ang balita sa illegal nga binuhatan sa usa ka mayor, aw inigka-ugma posible nga bisan og makakita lang siya og hulagway nga nag-two piece lang kay misalmot ang maong mga babaye og beauty contest iya nang ipasakmit.

Mahimo nga i-release niya inigkahapon na nga wala nay kapuslanan kay kinsa pa may mamalit sa newspapers sa hapon? Mao kini ang pipila sa punto nga among gipadangat didto sa forum kagahapon nga gipasiugdahan sa Kapisanan ng mga Brodkaster ng Pilipinas.

Kabahin sa mga “articles” nga gihulagway sa mga sakop sa Cebu City Anti-Indecency Board (CAIB) nga law-ay, bisan og wala namo giangkon nga kini naglakip og law-ay nga mga sugilanon, apan gihimoan na namo’g kausaban. Uwahi ko nga milakaw gahapon og dunay miduol nako og nangutana. Abi ninyo’g unsay iyang gipangutana? Tinuod ba kuno nga dunay usa sa mitambong kagahapon sa forum nga kabit og usa ka kanhi opisyal. Igo ra kong mikatawa ug nangambot.

Bisan ako nakadungog man sa tabi-tabi ug amigo usab nako ang kanhi opisyal apan wala ta’y ebidensya uy. Akong giingnan ang tawo nga nangutana nako nga “Bahala sila sa kanilang buhay.”

Pakapin! Diha’y higayon nga nagkainom kami ug ang kanhi opisyal. Dali ra man ning nahubog ug walay pupanagana nga gibulgar ang iyang kasinatian sa gugma. Psssttt. Secret!

* * *

Karong gabii, alegre na usab kaayo ang mga media dinhi sa Sugbo. Ang gisundog nila nga pamaagi sa contest sa presentation mao ang sa Pilipinas Got Talent. Pastilan, kami sa City Hall Beat ang among talent mao ra g’yud ang kanta ug sayaw.

Aw si Philipp Cerojano mora’g mokaon og kayo, pero kayo nga bugnaw. Ako mosundog ni Mayor Mike Rama nga mokanta. Hehehehe! Bitaw uy mga kauban sa media, kita-kita ta unyang gabii.

Ang venue sa Press Freedom culmination nights anaa sa tagsa-tagsa ninyo ka invitations. Kun wala ka makadawat og invitation sa ato pa wala ka imbitaha. Karong Septembre 30, culmination night na usab sa KBP Month.

Daghanang activities uy! Raffle pay imo nga dagko kaayo og premyo kay motorcycle ang grand prize ug mga appliances ang uban. Ako wala g’yud tawo’y daug-daug. See you all tonight!