Mabuhi ang KBP

Gawas sa pagsilot sa tulo niya ka higanteng mga sakop nga sibyaanan tungod sa nasobrahan nga live coverage sa hostage crisis sa Luneta sa Agosto 23 sa niaging tuig, ang Kapisanan ng mga Brodkaster ng Pilipinas (KBP) nidugang og mga probisyon sa kontrobersiyal nga Article 6 sa Broadcast Code (Crime and Crisis Situations) aron pagseguro nga di na maglibog ang mga magsisibya sa susamang umaabot nga mga krisis.

 Gikan sa unom ka orihinal nga probisyon, ang Article 6 gipalapdan ngadto sa 15 ka probisyon niadtong Oktobre 2010, duha ka buwan human sa duguong pagpamihag nga nipatay og siyam, apil nang hostage-taker.

* * *

Ang bag-ong mga probisyon gihulagway sa kadagkoan sa KBP nga motapak sa mga buslot nga nakapatumaw sa daghan ug usahay nagkasungi nga mga hubad sa mga magsisibya. Niang pipila:

 • Ang katungod sa kinabuhi mas mahinungdanon kay sa katungod pagpakisayod;

 • Ang mga sibyaanan gidasig sa pagtimbang-timbang angay bang ilangay ang pagsibya sa ilang live footage;

 • Ang mga magsisibya kinahanglang maghunahuna nga ang mga naghimo sa krimen makapaminaw o makakita sa tanan nilang sibya;

 • Ang mga magsisibya di makigsulti sa mga responsable o mga biktima nga way pananghid sa kapolisan;

 • Ang mga magsisibya kinahanglang magmatngon pagpreserbar sa mga ebidensiya sa crime scene; ug

 • Ang mga magsisibya kinahanglang magmabinantayon sa di paghagit sa mga responsable o pagpanghilabot sa sabutsabot.

* * *

Nabulit sa mga pagsaway ang KBP tungod sa giingong kalangay sa imbestigasyon ug sa kagamay sa mga silot. Ang imbestigasyon nahuman ug ang mga silot napahamtang niadtong Disyembre 2010, upat ka buwan human sa insidente. Mahimong isipon nga langay hangtod nga makaamgo ka nga ang gobyerno wa pay kasong napasaka o, kun duna man, wa pang kairog ang mga kaso batok sa ubang mas dagko og atraso sa insidente.

 Ang P30,000 nga multa sa mga sibyaanan gamay ra tuod kun itandi sa kadagko sa ilang kita. Apan mao ray labing dakong silot nga ikapahamtang ubos sa Broadcast Code. Gawas pa, ang dakong kadaot sa kaligdong sa mga napamatud-ang nakalapas di kabayran og kuwarta.

* * *

 Ang pag-usab sa Broadcast Code ug pagsilot sa iyang mga sakop nga magsisibya ug sibyaanan maoy konkreto nga mga lakang nga nahimo sa KBP human sa hostage crisis sa Luneta. Unsa may nahimo sa ubang kahugpongan, nga nagpatuong mas nagpakabana pagpatigbabaw sa kagawasan ug responsibilidad sa mga sakop sa media, gawas sa ilang way kinutoban nga mga pagarpar?

 Ang KBP di lunsay. Daghan siya og angay’ng usbon aron mamahimong tinuoray’ng representante sa gawasnon ug responsable nga pagpanibya sa radyo ug telebisyon. Di niya mahimong silhigan ang kahanginan gikan sa iresponsable, abusado ug mangilkilay nga mga turutot sa usa lang ka pamilok. Apan ang KBP naglihok ug nagpakabana. Di sama sa mga himantayon nga sige lang og pabuwa sa ilang baba. 

* * *

Email:  [email protected]