Brodkasters ug news sources
Giawhag sa mga news sources ang mga brodkaster nga mamahimong responsable ug makiangayon sa paghatud sa balita ug mga kumentaryo.
Ang awhag ilang gihimo atol sa usa ka forum nga gipasiugdahan sa Kapisanan ng mga Brodkaster sa Pilipinas agi og kabahin sa mga kalihukan sa pagsaulog sa Broadcasters Month.
Usa sa mga gidapit nga panelist mao ang mayor sa Cordova nga si Manlalaban Adelino Sitoy.
Matud si Sitoy nga usa siya sa mga nabiktima sa di makiangayon nga tratamento sa mga brodkaster labi na dihang nabulgar ang cybersex operation sa iyang lungsod.
Matud ni Sitoy nga nagpasagad lang ang mga kumentarista og pangatake niya nga wala susiha ang tinuod.
Si Sitoy nangangkon nga gilabhan siya sa way pagsusi kun kinsa ang nahimong instrumento aron madakpan ang mga tawo, labi pa ang mga ginikanan nga milawog sa ilang mga anak sa cyber pornography.
Giangkon ni Sitoy ang kredito nga siya maoy nakig-alayon sa National Bureau of Investigation aron mapahigayon ang pagpangronda.
Tugoti nga akong ibalik ngadto sa mga news sources sama ni Sitoy ang ilang panawagan alang sa mga brodkaster nga mamahimong responsable.
Aron mamahimong responsable ang mga brodkaster importante sab tingali nga husto ang impormasyon nga inyong ihatag ngadto nila.
Pananglitan ang pangangkon ni Sitoy nga siya maoy nakig-alayon sa NBI aron rondahon ang kalihukan sa cybersex sa iyang lungsod dili tinuod tungod kay ang Provincial Women's Commission pinangulohan ni Besi Gobernador Agnes Magpale ang nihimo niini.
Unya masuko diay mo kun mamahimo mo nga sentro sa kumentaryo?
Kun nihimo man og lakang si Sitoy batok sa paghitak sa cyber pornography sa iyang lungsod diha na human mabulgar ang makauuwaw nga kalihukan.
Busa sa dili pa siya modemanda sa mga brodkaster nga mamahimong responsable mas maayo tingali nga isip opisyal magbaton sab siya niini sa tanan niyang ipanulti ug dili mangangkon sa kredito nga dili iya.
* * *
- Latest
- Trending
