EDITORYAL - Simbahan miduyog sa mga trabahante

Maglisud na sa pagbalibad ang mga negosyante sa gipangayong umento sa suholan sa mga mamumuo karong miduyog na ang simbahan sa sentimento sa mga trabahante   batok sa kagamay sa P20 nga umento.

Ang gihimong hapin kanunay sa mga negosyante sa ilang pamalibad sa paghatag og arang-arang nga umento sa suweldo mao ang kahinay sa ilang negosyo.

Dali kaayo silang makapanghulga nga manangtang og mga trabahante sa higayong pugson sila sa paghatag og umento nga makapakontento sa   panginahanglan sa mga mamumuo.

Sa laktod ang ilang pagtan-aw sa ilang mga trabahante , murag way dakong papel ug kaakohan sa pagpalambo sa ilang negosyo.

Alang kanila modagan ra ang ilang negosyo bisan wa silay  mga trabahante, hinungdan nga kun mohatag man sila og umento, maguwang lang og dyutay sa limos.

Kay ang tinuod di na sila angayan pang eksplikahan nganong kuwang kaayo ang P20 nga umento.

Kini tungod kay nasayud na sila  unsa ka taas ang pagsaka karon sa     presyo sa mga palitonon. Ang mga trabahante nga daghan og anak mosamot sa kalisud ang pagpuyo ug di karon panahon nga basulon sila nganong nagpatuyang sa pagpanganak.

Ang mahinungdanon nga  sukdon usab sa mga negosyante ang panginahanglang umento sa suhol nga gipangayo sa mga trabahante.

Ang gihimo sa simbahan mao ang pagpabati nga sila miduyog sa kasub-anan sa mga mamumuo kinsa   imbis magmaya kay may umento nga gihatag ang mga employer, magul-anon lang gihapon tungod kay ang maong umento di man makalipay.

Karong mitingog na ang simbahan , asa kaha kutob ang kagahi sa balatian sa mga amo sa paghatag og makatarunganong   umento sa suweldo. Di ba?