Sayop ba gud ko?

Pananglit ako’y kuhaan og baruganan kun maayo ba nga mogasto ang dakbayan sa Sugbo og dul-an sa tunga sa milyon ka pesos aron ipalit og “firemen’s protective vest” nga alang sa mga sakop sa City Council – diha-diha moingon ko nga dili maayo.

Pastilan, nagnihit na man gani ang kwarta sa dakbayan sa Sugbo nga gamiton sa pagmugna og mga proyekto nga kapahimuslan sa katawhan, usik-usikan pa hinoon nato ang atong kwarta.

Naunsa gud tawon mo uy. Kining laraw nga magpapalit ang mga sakop sa Cebu City Council ug firemen’s protective vest nga tag P25,000 gisugyot ni Vice Mayor Joy Augustus Young, apan ang mihimo og resolusyon mao si Konsehal Noel Wenceslao.

Nalibkas man ang ba-ba ni Wenceslao ug nakasulti nga igo ra siyang gisugo ni Young nga moduso sa maong resolusyon. Ngano gud tawon nga mogasto pa ang dakbayan sa maong gidak-on sa kantidad?

Husto kaayo ang baruganan ni Konsehal Rodrigo “Bebot” Abellanosa nga wala mouyon niining maong sugyot. Usik-usik lang g’yud ni sa kwarta kay pipila ra g’yud tawon sa mga opisyal sa dakbayan ang moresponde og mga emerhensya, sama sa sunog.

Sagad diha sigi man lang og “patisoy.” Ayaw uy….ayaw g’yud ninyo og abusohi ang pagsalig sa katawhan kaninyo. Gipili kamo sa katawhan aron nga moatiman sa ilang panginahanglan.

Nganong magbaton man g’yud kamo og protective vest? Kun moingon kamo nga proteksyon kini sa inyong kaugalingon sa pagresponde og emerhensya, kamo ra diay?

Wala diay labot ang mga bombero? Ang mga sakop sa City Disaster Coordinating Council nga mao g’yud ang anaa sa “front line” walay labot? Ang husto kun mamalit man gani kamo niining mahalon kaayo nga protective gears, ihatag sa angayang hatagan.

Pastilan, pipila ra g’yud tawon kabook ang mga piniling opisyal sa Cebu City nga moresponde og alarma. Busa, palihug tawon mga mabuot nga sakop sa konseho, ayaw ninyo usiki ang kwarta sa katawhan.

Akong lauman nga si Konsehal Edgardo Labella ug ang ubang mga konsehal nga girespitohan g’yud diha sa Konseho motingog unta kabahin niining maong isyu. Pagpangutana gud kamo sa katawhan kabahin sa ilang reaksyon niining laraw nila ni Young ug Wenceslao dili ba masayran ninyo nga managsama kami og baruganan.

Nasayud ko nga ang uban nako nga mga higala diha sa konseho masuko tingali tungod kay gisupak nako ang ilang laraw. Apan ang ako lang ikasulti mao nga pabor ko kun ang sugyot makaayo, apan kun walay pulos, ayaw lang usab tawon.

* * *

Angay’ng ipasabut pag-ayo ni kanhi City Treasurer Ofelia Oliva kun ngano nga mi-certify man siya nga dunay kwarta nga kapin sa usa ka bilyon ang dakbayan sa Sugbo nga walay kabilinggan, dihang gipasar ang Supplemental Budget No. 3 atul sa panahon ni kanhi mayor Tomas Osmeña?

Si Osmeña igo lang nangutana kun duna ba’y surplus nga kwarta nga magamit sa supplemental budget. Tungod sa gihimo ni Oliva nga kun tinuod man nga walay kwarta ang dakbayan, apan iyang gi-certify nga duna, nakaingon g’yud si Tommy nga maayo ra nga gipatangtang niya si Oliva.

Kun ako pa si Oliva, angay’ng magpatawag ka’g dinalian nga press conference aron ipahibalo nimo sa katawhan kun ngano nga naingon niini ang sitwasyon.