Quality of education

Nagkaus-os kono ang quality sa atong education sa nasud. Pipila sa mga hinungdan mao kining mosunod: Nagka-us-os ang quality sa mga magtutudlo; kulang sa libro ug ubang mga basahon; walay library ang mga tunghaan, kun duna man, walay sulod; kulang sa mga lawak-tunghaan, kun duna man, karaan na kaayo, gubaon ug hugaw; di gani kapamalit og Philippine flag, tisas ug ubang gamit sa tunghaan, ug daghan pa (ang DepEd mas nahibawo ini).

Unsa may solusyon sa administrasyon ni Noynoy? Dungagan og duha ka tuig ang pagtungha. Sa ato pa, ang dugang duha ka tuig maoy makapataas sa quality sa education, bisag way libro, way classrooms, ug way chalk ug eraser.

Sa ato pa, ang mga bulok nga estudyante, mo-bright kun dungagan og duha ka tuig ang ilang pagtungha. Ngiga no? Sa ato pa, kitang kulang og duha ka tuig, kulang ba sad og kaalam? Motuo ka ini, Dro?

Gawas pa, ang daan nang nagsangkiig nga mga ginikanan, nga maglisud ganig palit og lapis ug medyas sa nagtungha nilang mga anak, all of a sudden mahayahay na ang ilang pagkabutang kun dungagan og duha ka tuig ang ilang pag-antos?

Di kaha hinoon ni makadugang sa gidaghanon sa mga dropouts, kaylagi, di na madaa sa bulsa sa mga ginikanan?

Unya, kun mahimo nang balaud ang RH Bill, idugang pa gyud ang sex education kay ilang tudloan ang kabataan unsaon paggamit sa condom aron kapugngan ang pagkamabdos? Unsa man ni, makapataas ba sa quality of education ang sex education? 

* * *

Gisugdan nag panangtang ug pagpapas ang mga dagway ug ngalan sa mga public official nga gipatik sa mga sakyanan ug ubang kabtangan sa gobyerno. Nindot ni. Maayo unta’g ilakip ang mga tents nga nagdala sa mga ngalan sa public officials, unya, pakapinan dayon pag-ingon nga: “and the city council.”

Bisan kining pag-ingon nga “A project of the City government of Cebu,” di sad ni maayo. Nganong butangan man gyud? Hadlok ang Cebu City government nga angkonon sa City of Tagbilaran o City of Dumaguete? Ambut nganong ingon man ta niini uy? Dawo kaayo sa publicity. Mga sakyanan sa gobyerno, gawas sa personal nga gamit sa mga opisyal, magdala gyu’g ngalan sa mga public official. Unya, dili ilakip ang ‘FOR OFFICIAL USE ONLY” nga paskin nga maoy importante.

Hasta nang sakyanan sa SK, mapuno sa ilang mga ngalan, kay ila konong proyekto. Kahilas ra! Kahinumdom ta nga sa panahon ni Gloria, hapit tanang eskina sa tibuok nasud anaa ang tarpaulin ug mga billboards (colored pa) nagpatik sa iyang ngalan ug dagway. Pastilan!

Mao sad sa pipila natong mga simbahan, puno sa ngalan sa mga donors ang mga lingkoranan ug ludhanan, ug dili pa ang Santos nga Misa, kinahanglan basahon una ang ngalan sa gipamisahan ug nagpamisa. Pastilan, Pinoy! Duna ba god ni epekto in the eyes of God? Nganong di man ta mosugot nga ang Ginoo ray magpasalamat nato? Nganong kinahanglan man gyud ang public announcement?

Usahay ra ba, ang pagbasa sa mga ngalan mas taas pa kay sa Misa itself. Mora sad sa sermon sa ubang mga pari nga mas taas pa kay sa Santos nga Misa.