State of Naga Address

Bisan “final” na ang desisyon sa Korte Suprema nga siyudad na gyud ang Naga, wala pa mahuman ang pagpakigkombate sa mga Nagahanon.

Karon nga human na ang kombate sa Korte Suprema, ang kombate anaa na sa Malacañang.

Si Kongresista Eduardo Gullas miingon sa iyang pamulong niadtong Lunes nga kasaulogan sa ika-upat nga Charter Day sa Naga nga si Budget and Management Sec. Butch Abad dili mosugot nga ihatag ang Internal Revenue Allotment (IRA) nga sarang alang sa siyudad sukad nahimong “final” ang desisyon sa Korte Suprema niadtong Hunyo 28.

Sa kasamtangan, ang Naga nagdawat pa gihapon sa IRA sa usa ka lungsod bisan usa na kini ka siyudad.

Gipasalig hinuon ni Gullas nga paninguhaon niyang makolekta ang “utang” sa Malacañang nga IRA sa Naga nga mokabat og P100 milyones.

Apan bisan niini, gipasalig ni Mayor Valdemar Chiong sa iyang SNA (state of Naga address) nga bisan pa sa kagamay sa IRA, padayonon niya ang pagpalambo sa siyudad sa Naga nga nahimo nang “industrial hub” sa lalawigan sa Sugbo.

Apan angay ikalipay sa mga residente sa Naga ang pasalig ni Mayor Val nga magpadayon ang iyang pagsuporta sa mga industriya nga anaa mag-operate ug gustong mo-operate sa maong siyudad, apan iyang paninguhaon nga dili masakripisyo ang panglawas sa mga residente.

Anaa sa Naga ang 200-megawatt nga Kepco-Salcon Power Plant, mga feedmill, ug uban pa. Ang Gaisano Metro magbukas og dakong tindahan nga anaa mahimutang tupad mismo sa Naga City Hall.

Kining mga establisamento ug mga industriya makahatag kini og trabaho sa mga residente sa Naga.

Si Mayor Val mipasalig usab og scholarship grant sa 100 ka mga tinun-an sa tag-P30 mil matag tuig matag usa, gawas sa Philhealth insurance sa 20 mil ka pamilya nga ihatag sa siyudad, inabagan ni Gob. Gwendolyn Garcia.

* * *

Kinahanglan og suporta sa publiko ang pagpangusog ni Kongresista Luigi Quisumbing nga kahimoan og congressional inquiry ang pagkatap karon sa cybersex dens nga mibiktima og mga bata ug kababayen-an, ilabi na sa lungsod sa Cordova.

Grabe na kadayag niining cybersex. Gani, sa akong nahibaw-an daghan nang mga batan-ong mga babaye ang nangundang na sa ilang pagtungha kay nabuang sa pag-posing-posing sa webcam, samtang nakig-chat og bastos nga mga langyaw.

Pareho kami og obserbasyon ni Quisumbing nga dili lamang sa Sugbo naa kining cybersex.

Isip magbabalaod, angay mahibaw-an ni Quisumbing ang rason sa pagkatap niini.

Hinuon sumala pa ni Quisumbing nga nakatabang kaayo ang impormasyon gikan sa mga residente. Ang “tsismis” maoy nakatabang nga naabot sa mga awtoridad ang impormasyon kalabot sa operasyon sa cybersex den sa Cordova.

Wala man ugaling maabot sa buhatan ni Mayor Adelino Sitoy ang impormasyon, apan naabot kini sa Provincial Women’s Commission pinaagi sa sumbong sa mga nagpakabanang lumolupyo sa Cordova.

Pero nganong wala man pud sila mosumbong deretso ngadtong Sitoy?

Hadlok silang Sitoy? O wala silay salig ni Sitoy?

Ang congressional inquiry alang sa cybersex makatabang usab aron mahibaw-an ang mga pamaagi niini aron kahimoan og mga balaodnon kalabot niini.

* * *

Oras na tingale nga pa-eskuwelahon og antri-robbery tactics ang mga guwardiya nga pabantayon og mga bangko ug mo-escort og mga armored vans. Ang tulis niadtong Lunes sa buntag sa sulod sa Robinson’s Place nagtug-an kadto sa kabanga sa mga guwardiya ug empleyado sa bangko.

Tiaw mo na, naa pa gyud mahitabo ang tulis sulod sa department store?

Dili ko moingon nga wala nay mamatay nga guwardiya o wala nay tulis nga mahitabo kun ang mga security guards nga idestino sa mga bangko ug armored vans makatungha og special course nga anti-robbery tactics.

Apan ang akong punto mao nga kun makatungha niining kursoha ang mga security guards, mahibalo na sila unsay maayong taktika kun mahitabo ang tulis.

Awhagon nato ang PNP nga ipatuman kining polisiya nga kun walay certificate of training sa anti-robbery tactics ang guwardiya, dili kini idestino sa mga bangko ug armored vehicles ug uban pang establisamento nga nag-atubang sa risgo sa tulis.

Gawas sa maong kurso, himuong requirements sa mga guwardiya ang gun safety ug shooting course aron makapabuto og armas ngadto sa mga accredited nga firing range bisan 50 lang ka bala matag tuig, iyawat makasinati sila sa boto sa armas.

Maayo man gani nga tanang guwardiya ang ipa-ubos niining maong training.

Kay sa akong obserbasyon karon, pipila ra sa mga guwardiya ang makamao mopabuto sa ilang armas. Daghan kanila, mobuto ra ilang armas kun mahulog.