EDITORYAL - Ang pagpamugaw

Kining pamugaw dugay naman ning matanga sa panginabuhi sa mga tawo nga naanad na sa maong industriya.

Usa ka matang sa trabaho nga hayahay kay mahimong libre pa sa lawasnong kalipay diha sa ilang gibugawan o gi-ahentiang babaye, wa magbayad og buhis, sa laktod   way hasol nga trabaho.

Ang problema lang mao ang pagpangita og mahimong customer sa ilang gibugawan ug gani bisan lawom nang gabii hangtod sa kaadlawon bisag magbagyo pa anaa sa karsada magpunay’g wara-wara sa panahong moagi ka, ilabi na kun may sakyanan ka.

Ang uban manuroy sa mga beer house, mga night club ug uban pang lugar nga imnanan o pundokanan sa daghang laki   mangahente alang sa gibugawan nilang babaye.

Wa kini hilabti sa mga otoridad sa kagamhanan ug malagmit basin nagtuo ang kadaghanan nga tanang gidulot ning mga bugaw pulos kaayohan sa mga laki.

Ang dalan Junquera ning dakbayan wa pa ta matawo daan nang nabaniog nga usa sa mga dapit ning dakbayan nga lugar sa mga babayeng   namaligya sa ilang lawas nga sama ra sa magpalit ka og ginamos ug nakapabarato  kaayo sa dungog sa babaye .

Niining bag-o di lang kay mga babaye ang anaa sa maong lugar kundi ang nagkalainlaing matang sa gidiling drugas gipangahentian na usab sa mga bugaw.

Sa laktod ang mga bugaw diha mahimong duha na ka klaseng produkto ang ilang giahentian, ang babaye ug ang ginadiling drugas.

Diha sa babaye di na maihap ang mga laki nga nakabsan sa kinabuhi gumikan sa giingon nilang pag-“kasira”. Sa pagkakaron di lang kutob sa pagka-sira ang dangatan sa mga laki nga mopalit nianang mga baligyang babaye sa mga bugaw kundi AIDS na.

Sa baligyang shabu, diha molipang ang   dagkong krimen gikan sa pinatyanay, lugos, tulis, ug nagkadaiyang matang sa krimen nga mihugpa ning dakbayan.

Busa ang pamugaw dako kaayo og gikatampo sa kadaot sa kinabuhi sa tawo gawas   sa paggusbat sa moral sa kababayen-an ngadto na sa ikabuang sa tawo gumikan sa gidiling drugas, busa angay ba silang pasagdan ?   Di ba?